Julkeyer net tayn priiter im klaawe
1Tuut aan nëme weyer xwach is im klaawe oone tëm persoon sayn meenunge kritiseere. 2Tsum payxpiil, phaar layt klaawe tas se fon ales ese khëne, awer weyer xwach im klaawe is, est noore kemiise. 3Weyer fon ales est tëref net ferachte tii woo tas net mache. Un weyer ploos kemiise est tëref net konteneere weyer fon ales est, wayl Hërkot hot em aan kenom. 4Weyer pist tuu fer yemant sayne tiiner julkeere? Op tee kewine tuut ore ferleere tuut, keet ploos tëm sayne hër aan. Un tee tuut kewine wayl te Hër khan em kewine mache.
5Phaar layt tënke tas etliche taache importanter sin als ti anere, un anere layt tënke tas ti taache al ekaal sin. Yeete ëne mus kans xtram sin in sayn meenunge. 6Weyer mee weyert kept fer seliche taach macht tas fer te Hër se eere. Un aach weyer fon alem est macht tas fer te Hër se eere, wayl tankt fer te Hër sayn neerung. Un weyer net fon alem est macht tas fer te Hër se eere un kept Kot say tankt. 7Wayl khee ëne fon uns leept fer sich selwer un khee ëne fon uns xtërept fer sich selwer. 8Wën meyer leewe, is fer te Hër woo meyer leewe; un, wën meyer xtërwe, is aach fer te Hër woo meyer xtërwe. Soo, wën meyer leewe ore wën meyer xtërwe, keheere meyer em Hër. 9Wayl Kristus is kextorep un is noch mool peleept fer te Hër sin fon te toote soo wii fon te leewente. 10Also, warom tuust tuu, woo ploos kemiise ese tuust, tayne pruuter konteneere? Un tuu, woo fon alem ese tuust, warom ferachtst tuu tayne pruuter? Wayl meyer al sin foer Hërkot fer julkeyert se kewe fon tëm. 11Is tas was ti Hayliche Xrifte saan:
“Ich xwoore iwer mayn leewe, saat te Hër,
tas al sich foer mich kniye
un al fersichere tas ich Hërkot sin.”
12Soo, yeete ëne fon uns tuut sayn aychne aprechnung mache foer Hërkot.
Mach net tayn priiter fale
13Tesweche, wole meyer uf heere ëne te anere se kritiseere. Im keeche teel, tas yeete ëne niks mache sol woo sayne pruuter xtolpere mache khan ore in sinte fale. 14Wayl ich fereenicht sin mit em Hër Yeesus, sin ich sicher tas niks trekich is fon sich selwer. Awer, wën yemant tënkt tas etwas trekich is, tan kept tas trekich fer tee woo tas mënt. 15Wën tuu machst tas en pruuter traurich kept weche was tuu ese tuust, tan pist tuu net mit liipe am um keen. Los net tas yemant weche weem Yeesus kextorep is sich ferleere tuut weche em ese woo tuu ese tuust. 16Kept khee uersach fer ti anere xlecht xpreche fon was teyer kuut fint. 17Wayl te Hërkots Raych keet net ums ese un trinke, awer richtich se leewe, in friite un mit frayt woo te Hayliche Kayst kept. 18Un weyer Kristus soo tiint tuut Hërkot kefale un kept fon al aproweyert.
19Tesweche, mise meyer imer suuche tings woo friite pringt un woo uns helfe ëne te anere im klaawe xtërkere. 20Tuu net weche ese xteere was Hërkot kemach hot. Aler naarungs mitel khan kes kewe, is awer ferkheyert etwas ese wën tas macht tas yemant in sinte falt. 21Was richtich is, is khee flayx ese, khee wayn trinke, net etwas aneres tuun woo en pruuter in sinte fale macht. 22Awer, pehal tswixe tich seleptst un Hërkot was tuu klaapst iwer tii sache. Kliklich is te persoon woo net konteneyert kept fon sayne kewise wën se macht was se mënt mist kemach kewe. 23Awer, weyer tswayfle hot iwer was ese, kept fon Hërkot konteneyert wën eyer ese tuut, wayl tas woo eyer macht hot net sayn basis am klaawe. Un was net aus em klaawe khomt is sinte.
