Reemer 13

₁Tuut ti autoriteete aan heere. Wayl khee een autoriteet eksisteyert oone Hërkot sayn erlaupnis, un tii woo eksisteere waare fon iim uf sayn plets ketuun kep. ₂Soo, weyer sich rewolteyert keeche ti autoriteete is sich am rewolteere keeche was Hërkot keortnet hot, un tii woo soo mache kewe konteneyert. ₃Ploos tii woo tas xlechtes tuun mise pang hon fon ti autoriteete, un net tii woo tas richtiches tuun. Wën tuu khee pang fon ti autoriteete wilst hon, tan mach was kuut is, un tii tuun tich loope. ₄Wayl ti autoriteete sin Hërkot sayn tiiner am xafe fer kuut fer tich. Awer, wën tuu xlechtes tuust, tan must tuu pang hon, wayl ti autoriteete hon ti macht fer se xtroofe. Tii sin uf Hërkot sayn aarwat un pringe tëm sayne xtroof iwer tii woo xlechtes tuun. ₅Tesweche must tuu ti autoriteete aan heere; net ploos weche Hërkot sayne xtroof, awer aach wayl tayne kewise xikt tas mache.

₆Is aach tesweche woo teyer xtayer petsaalt. Wayl, wën ti autoriteete sayn flichte in hale, sin se uf Hërkot sayn aarwat. ₇Also, petsaalt was tëne keheyert. Petsaalt al ayre xtayre un rexpekteyert un tuut ale autoriteete eere.

₈Playpt niks xultich fer nimant. Te eensichste xulte woo teyer mist hon is ëne te anere liipe. Weyer ti anere liipt is ti kesets am noo keen. ₉Tii kepoote: “Tuu khee eepruch aan xtele, tuu net umpringe, tuu net xteele, tuu net pekeere” — tii un noch anere mee khëne kesaat kewe in en eensichste kepoot: “Liip ti anere wii tuu tich selepst liipst.” ₁₀Weyer ti anere liipt tuut tëne khee xaate. Also, liipe is ti kans kesets noo keen.

₁₁Teyer mist tas kans tings mache wayl teyer wist in was fer tsayt meyer am leewe sin; ti uertsayt is khom fer wach se kewe, wayl te momënt fer keret kewe is yets fiil tichter wii wën meyer aankefang hon se klaawe.

₁₂Ti nacht khomt xon ans ën un te taach khomt xon aan. Tesweche, mise meyer uf heere se mache was te tunkelheet keheyert un unser kaystliche keweere hoole fer im licht se khëmfe. ₁₃Meyer sole kexayt leewe, wii mënxe woo im licht fom taach leewe. Niks fon xlechte feste ore sauferay, khee imoraliteet ore unaanxtënichkheet, khee krach ore ayfersichtichkheet. ₁₄Awer, solt ti kwaliteete hon woo te Hër Yeesus Kristus hot un fersuucht net ti xlechte winxe fon ayer mënxlich natuer tsufriite hale.