Tas naye leewe in Hërkot sayn aarwat
1Also, mayn priiter, weche Hërkot sayn kroos paarmhërtsichkheet, ferlange ich tas teyer aych kans opfere tuut fer Hërkot als en leewente opfer, hiin kep in tëm sayn aarwat un fer iim se kefale. Tas is ti waare aanpeetung woo teyer fer Hërkot opfere mist. 2Leept net wii ti layt fon tee welt leewe, awer lost tas Hërkot aych transformeyert torich en komplët ferënerung fon ayre sin. Soo tuut teyer em Hërkot sayne wile khëne lërne, tas mënt, was kuut is, perfekt un woo tëm kefale tuut.
3Weche Hërkot sayn kuutheet mit mich, mich am ruufe fer aphostel sin, saan ich fer aych al tas teyer aych net peser rechent wii teyer aychentlich sayt. Kraat es keeche teel, tënkt oone inpiltung iwer aych selepst, un yeete sol sich selwer julkeere mit em klaawe woo Hërkot iim kep hot. 4Wayl, soo wii in en eensichste khërwer hon meyer fiil teeler, un al tii hon ferxiitne funktsioone, 5soo aach meyer, wën meyer ach fiil sin, sin meyer eene eensichste khërwer wayl meyer fereenicht sin mit Kristus. Un meyer al sin fereenicht ëne mit te anere wii ferxiitne teeler fon eene ensichste khërwer. 6Also, meyer sole unser ferxiitne talënte penutse tëm noo ti knaate woo Hërkot uns kep hot. Wën te talënt woo meyer kriit hon is fer Hërkot sayn mensaaj aan saan, sole meyer tas mache tëm noo te klaawe woo meyer kriit hon. 7Wën es te talënt fer se tiine is, tan sole meyer tiine; wën es is fer se unterichte, tan sole meyer unterichte. 8Wën es te talent fer ti anere uf muntere is, tan sole meyer uf muntere. Weyer mit te anere teele tuut was eyer hot, tas eyer tas mit kuutheet macht. Weyer autoriteet hot, sol sayn autoriteet penutse mit aler kuute soriche. Weyer ti anere heleft, sol mit frayt helfe.
9Tas ayre liipe net ferxtelt sol sin. Hast ti xlechtichkheet un keet noo was kuut is. 10Liipt ëne em anere mit priiterliche liipe in Kristus un tuut aych aanxtrënge fer mit rexpekt ëne te anere pehantle. 11Xaft mit entusiasmus un sayt net faulënser. Tiint te Hër mit em hërts fol klaawe. 12Tas ti hofnung woo teyer het aych munter halt; sayt ketultich in te layte un tuut imer peete. 13Ferteelt mit te priiter woo es neetich hon was teyer hot un tuut ti frëmte uf nëme in ayre hayser.
14Ferlangt tas Hërkot seechne tuut tii woo aych yachte. Yoo, ferlangt tas eyer ti seechne tuut un net ferfluuche tuut. 15Frayt aych mit tëne woo sich fraye un prilt mit tëne woo prile. 16Tuut ti layt al ekaal uf pase. Sayt net hooch muutich, awer tuut keweenliche aarwate aan nëme. Tas khee ëne fon aych tënke tuut tas eyer en wisente is!
17Tuut fer nimant tas xlechte mit xlechtes petsaale. Fersuucht ales mache soo tas ti anere aych kuut aan nëme. 18Macht ales was meechlich is fer in ruu se leewe mit ale layt. 19Mayn liipe priiter, tuut aych nii fon nimant rache; kraat es keeche teel, lost tas Hërkot te xtroof kept. Wayl ti Hayliche Xrifte saan:
“Ich tuun mich rache,
ich tuun ti aprechung mache mit tëne,
saat te Hër.”
20Awer macht wii ti Xrifte saan:
“Wën tayne faynt hunger hot, kept tëm se ese;
Wën eyer torxt hot, kept tëm waser.
Wayl soo machst tuu tas tee ferprëne tuut in roye un xaam.”
21Lost net tas ti xlechtichkheet aych ap kewine tuut, awer kewint ap fon te xlechtichkheet mit kuutheet.
