Hërkot sayn paarmhërtsichkheet mit Israël
1Tan frooe ich: meecht Hërkot sayn aychne folek ap kextoost hon? Sicher net! Ich selepst sin en israelite, nookhomer fon Aapraham un mitkliiter fom xtam Benyamin. 2Hërkot hot net sayn folek ap kextoost, woo eyer aus kesuucht hat tsayt am aanfang. Teyer wist kans kuut was ti Hayliche Xrifte saan in tëm xtik woo Eliias tas folek aan kept foer Hërkot. Eliias saat soo: 3“Hër, tii hon tayn profëte umkeprung un hon tayn altaare niter keris. Ich sin te eensichste woo iwerich keplip is, un tii wole mich umpringe!” 4Was hot Hërkot tëm kesaat? Eyer saat: “Ich hon siwe tausent mëner fer mich uf kehoop woo net te kot Baal atoreyert hon.” 5Tas selwiche paseyert aach yets. Weche Hërkot sayne knaate, is noch en kleene numer fon tëne woo eyer aus kesuucht hot. 6Sayn aus suuche hot sayn basis an Hërkot sayne knaate un net an was se kemach hon. Wayl, wën Hërkot sayn aus suuche sayn basis het an was ti mënxe mache, tan weyer tëm sayne knaate net te wërkliche knaate.
7Un tas petayt tas es net tas folek fon Israël waar woo kefun hot was se am suuche waare. Weyer kefun hot waar ploos en kleene krupe woo Hërkot aus kesucht hot; ti anere wolte net Hërkot sayne ruuf aan heere. 8Wii ti Hayliche Xrifte saan:
“Hërkot hot tëne sayn hërts un tëne sayn sin hart kemach;
hot tëne aue kep woo net siin khëne
un oore woo net heere khëne
pis hayt tsu taach.”
9Un Dawii saat:
“Mach tas uf tëne sayn feste se kefang kewe un petroo kewe,
tas se fale tuun un kextrooft kewe!
10Ooh, Hërkot, mach tas se plint kewe
un fer imer kepikt playwe unich em kewicht fon iire xwiirichkheete!”
11Yets, frooe ich: wan ti yute kextërtst sin, meechte se kefal sin fer nii mee uf xtaye? Is sicher net! Awer, wayl se sinte kemach hon, is ti retung khom fer tii woo khee yute sin, fer se mache tas ti yute ayfersichtich keepte iwer tëne. 12Te yute sayne sint hot kroose seechnunge keprung fer ti welt, un sayn kaystlich aarmut hot rayche seechnunge keprung fer tii woo khee yute sin. Tan, wën te numer fon yute komplët kept, wëre ti seechnunge noch fiil kreeser sin.
Ti retung fon tëne woo khee yute sin
13Yets sin ich am xpreche mit aych woo khee yute sayt. Soo lang wii ich te aphostel sin fon tëne woo khee yute sin, wil ich mich fraye uf mayn aarwat. 14Filaycht khan ich mache tas tii fon mayn aychne folek ayfersichtich kewe, un soo meechlich mache tas phaar keret kewe. 15Wayl, wan ti yute ap kextoost kep sin, is te rest fon te welt froynt fon Hërkot kep. Was paseyert tan wën tii aan kenom kewe? Tii woo toot sin kriin es leewe!
16Also, wën tas eyerxte kepakte proot noo te ërnt keopfert kept fer Hërkot, tas petayt tas tas kanse anere proot aach keopfert is fer Hërkot. Un, wën ti wortsle fon en paam keopfert kewe fer Hërkot, sin ti est aach tëm. 17Phaar est fom keplanste oliiwe paam sin ap keproch kep, un en ast fon wilte oliiwe paam is traan kephost kep. Also teyer, woo khee yute sayt, sayt wii tee wilte oliiwe paam un halt yets teel an te kraft un kaystlich raychtum fon te yute. 18Soo, teyer tëreft net ti est woo ap keproch kep sin ferachte. Wii khënt teyer xtols too triwer sin? Teyer sayt ploos est. Sayt net teyer woo ti wortsel hale tuut — is ti wortsel woo aych halt.
19Awer, teyer wërt saan: “Yoo, awer ti est sin ap keproch kep fer plats se kewe fer uns.” 20Tas is woer. Awer, tënkt traan tas tii ap keproch kep sin wayl se net keklaapt hon; awer teyer sayt noch am oliiwe paam wayl teyer klaawe tuut. Un tuut aych net xtolseere too truf; anxtat, solt pang hon. 21Wën Hërkot net te xtroof fer ti yute neewe kelos hot, woo sin wii natierliche est, mënt teyer tas tee aych net xtroofe tuut? 22Kukt wii Hërkot kuut is un aach xtram is. Eyer is xtram fer tii woo kefal sin un kuut fer aych, wën teyer wayter klaawe tuut an tëm sayn kuutheet. Wën net, kept teyer aach ap kehakt. 23Un, wën ti yute sayn unklauplichkheet neewe lose, kewe se inkephost in te keplanste oliiwe paam, wayl Hërkot khan se noch mool phoste. 24Teyer, woo khee yute sayt, sayt wii tee wilte oliiwe ast woo ap kehakt kep is un kephost kep is, keeche ti natuer, an te kuute oliiwe paam. Ti yute sin wii tee kuute oliiwe paam. Soo, fer Hërkot is es laycht noch mool phose, an sayne aychne paam, tii ferprochne nest.
Hërkot sayn kuutheet mit al
25Mayn priiter, ich wil tas teyer ti ferxtekelt woerheet khëne tuut tas teyer net tënkt tas teyer aarich wisent sayt. Ti woerheet is tii: ti tik khopichkheet fom israelite folek halt net fer imer, awer ploos pis te numer fon tëne woo khee yute sin woo an Hërkot khome komplet kept. 26Soo is es tas es kanse folek fon Israël keret kept. Wii ti Hayliche Xrifte saan:
“Te Reter khomt fon Sioon
un hoolt ti kans xlechtichkheet wech
fon te nookhomer fon Yaakop.
27Ich, te Hër, mache tii alians mit tëne,
wën ich tëne sayn sinte wech nëme.”
28Ti yute hon te ewankeelium ap kextoost un tesweche sin se Hërkot sayn faynte, fer ayre kuut, woo khee yute sayt. Awer, wayl Hërkot se aus kesuucht hat, sin tii tëm sayn froynte, weche te patriarke. 29Wayl Hërkot ënert net sayn ketanke iwich weem eyer aus suuche tuut un seechent. 30Awer, frier, het teyer, woo khee yute sayt, Hërkot net aan keheyert. Un yets het teyer fon Hërkot sayn paarmhërtsichkheet kexënkt kriit wayl ti yute Hërkot net keheyert hon. 31Soo, weche Hërkot sayn paarmhërtsichkheet woo teyer kriit hot, tuun ti yute yets Hërkot net aan heere tas tii aach yets tëm sayn paarmhërtsichkheet kriin khëne. 32Also, Hërkot hot kemach tas ale layt kefangne weere fon te unkeheersamkheet fer paarmhërtsichkheet se tsayche fer al.
Loop fer Hërkot
33Wii kroos sin Hërkot sayn raychtume! Wii tiif sin sayn khëntnis un sayn wisheet! Weyer khan sayn pextimunge ausleye? Weyer khan sayn pleen ferxteen? 34Wii ti Hayliche Xrifte saan:
“Weyer khan em Hër sayne sin khëne?
Weyer hot ti kapasiteet fer tëm raat se kewe?
35Weyer hot xon etwas fer Hërkot kep fer en petsaalung tsurik kriin?”
36Wayl eyer hot aler tings ketsoo, un ales eksisteyert torich iim un fer iim. Kloor fer Hërkot fer imer! Aamen!
