1Mayn priiter, ich winxe tas mayn aychne folek keret kept. Un ferlange fer Hërkot weche tëne 2wayl ich sin tsayer tas ti sich fiil hiin opfere fer Hërkot. Awer tëne sayn uf opferung hot net sayn basis am echte khëntnis, 3wayl ti khëne net wii Hërkot ti mënxe aan nëmt un soo tuun se tas suuche uf sayn aychne aart. Tii hon Hërkot sayn aart fer ti mënxe aan nëme ap kesaat. 4Wayl, mit Kristus, is ti kesets ans ën khom, un soo tii woo klaawe sin tii woo aan kenom kewe fon Hërkot.
Ti retung is fer ale layt
5Also, was Mooses kexrip hot iwer ti layt aan kenom kewe fon Hërkot torich ti kesets noo keen, waar tas: “Leept tee woo macht was ti kesets xikt.” 6Awer, was se tuun hot mit aan kenom kewe fon Hërkot torich te klaawe, saat Mooses soo: “Tuu tërefst net soo tënke: weyer keet ruf noo em himel?”, was mënt, fer Kristus fom himel se pringe. 7“Tuu net mool frooe: weyer keet noo te welt fon tort une?”, was mënt, fer se mache tas Kristus fon te toote welt ruf khomt. 8Was Mooses saat is tas: “Hërkot sayn mensaaj is ticht pay tich, in tayn lipe un in tayn hërts” — tas is, ti mensaaj woo meyer aan saan. 9Wëns tuu mit tayn munt saast: “Yeesus is te Hër” un in tayn hërts klaawe tuust tas Hërkot Yeesus peleept hot, kepst tuu keret. 10Wayl meyer klaawe mit em hërts un kewe aan kenom fon Hërkot; meyer xpreche mit em munt un soo kewe meyer keret. 11Wayl ti Hayliche Xrifte saan: “Weyer an tëm klaawe tuut kept net tesaponteyert.” 12Tas kilt fer ale layt, wayl es kept khee unerxiit tswixe yute un tii woo khee yute sin. Hërkot is te selwiche Hër fer al un tuut raychlich seechne al tii woo sayne hilef ferlange. 13Wii ti Hayliche Xrifte saan: “Al tii woo em Hër sayne hilef ferlange kewe keret.”
14Awer, wii is es tas ti layt hilef ferlange tuun wën se net an Hërkot keklaapt hon? Un wii khëne se klaawe, wën se net ti mensaaj heere tuun? Un wii khëne se heere wën ti mensaaj net aan kesaat kept? 15Un wii kept ti mensaaj aan kesaat, wën khee mensajeyer aus kexikt kept? Ti Hayliche Xrifte saan: “Wii xeen is es siin ti mensajeyer kuute naychkheete am pringe!”
16Awer, net yeete ëne tuut ti kuut naychkheet fom ewankeelium aan nëme. Es waar Isaiias woo kesaat hot: “Hër, weyer hot keklaapt an unser mensaaj?” 17Also, te klaawe khomt torich ti mensaaj am aan heere, un ti mensaaj khomt torich tas aan saan iwer Yeesus Kristus.
18Awer, ich frooe: meechte ti net ti mensaaj keheyert hon? Is sicher tas se keheyert hon! Wii ti Xrifte saan:
“Tëne sayn xtim hot sich ferxtraut iwer ti kans welt;
tëne sayn wërter sin uf aler plets fon te eyert aan khom.”
19Ich frooe noch: meecht tas folek fon Israël tas net se wise kriit hon? Mooses waar te eyerxte woo en antwort kep hot. Eyer saat:
“Ich mache tas teyer ayfersichtich kept fon en folek woo khee natsioon is;
ich mache tas teyer wuut kriit fon en natsioon fon layt oone ferxtant.”
20Un Isaiias hot mee koraaj fer aan se saan was Hërkot saat:
“Ich sin kefun kep torich tii woo mich net am suuche waare,
un sin tsum foerxayn khom fer tii woo net noo mich kefroot hon.”
21Awer, iwer Israël, saat Hërkot:
“Te kanse taach hon ich ti ërem uf kehal,
fërtich fer uf se nëme en repëlte folek woo mich net heyert.”
