Reemer 16

₁Ich presenteere aych unser xwester Feepe, woo ti khërich in Senkrëya tiine tuut als tiakoonin. ₂Tuut ti xwester uf nëme im Hër sayne naame, wii em Hërkot sayn folek es mache sol. Kept tëm ale hilef woo se hon mus, wayl tii hot fiil layt keholef un mich aach.

₃Ich xike pekriisunge fer Prisila un sayne man Akila, mayn khameraate in Yeesus Kristus sayn aarwat. ₄Tii hon sayn leewe in risk ketuun weche mich. Ich sin tëne kans tankpaar; un net ploos ich, awer aach ti kanse khëriche fon tëne woo khee yute sin. ₅Pekriisunge aach fer ti khërich woo in tëne sayn haus sich fersamelt.

Pekriisunge fer mayne liipe froynt Epeeneto, woo te eyerxte waar woo an Kristus keklaapt hot in te prowins Aasia. ₆Pekriisunge fer Mariia, woo fiil weche aych am xafe is. ₇Pekriisunge fer Antroonikus un sayn xwester Juunia, mayn yutixe lantlayt, woo mit mich in te katee waare. Tii sin kuut pekhant unich te aphostle un sin foer mich kriste kep.

₈Pekriisunge fer Ampliiatus, mayne liipe pruuter im Hër. ₉Un aach fer Urpan, unser khameraate in te aarwat fer Kristus, un fer mayne liipe froynt Eustakio. ₁₀Pekriisunge fer Apëles, en pruuter woo fiil pewaysunge am kewe is fon sayne klaawe an Kristus. Pekriisunge fer ti layt fon Aristoopul sayn familye. ₁₁Pekriisunge fer Herotion, mayne yutixe lantman un fer ti kristliche priiter in Narsiso sayn familye.

₁₂Pekriisunge fer Trifeena un Trifoosa, xwestre woo im Hër sayn aarwat xafe, un fer mayn liip froyntin Përsite, woo aach fiil am xafe is fer te Hër. ₁₃Ich xike pekriisunge fer Rufus, aarwater woo im Hër sayn tiinst sich foer ketuun hat, un fer sayn moter woo mich imer als soon pehantelt hot. ₁₄Pekriisunge fer ti priiter Asiinkritus, Fleekont, Hermes, Patropas, Hermes un ale priiter woo pay tëne sin. ₁₅Pekriisunge fer Filolokus un Julia; fer Nereu un sayn xwester; fer te pruuter Olympas un ale layt fon Hërkot sayn folek woo pay tëne sin.

₁₆Pekriist ëne te anere mit en friite khus. Ale kristliche kemaynte xike aych pekriisunge.

₁₇Mayn priiter, ich ferlange tas teyer aych uf pase tuut mit layt woo xpalunge prowokeere, woo ti anere xteere im klaawe un keen keeche ti untericht woo se kelërnt hon. Playpt wech fon tëne layt, ₁₈wayl tii woo tas tings mache sin net Kristus am tiine, awer sich selwer. Torich xeene wërter un flaternt kexpreech, tuun se tas hërts fon eenfache layt hinerkeen. ₁₉Yeete wees wii teyer leaal keplip sayt uf te ewankwelium, un tesweche fraye ich mich weche aych. Ich wil hon tas teyer wisent sayt iwich was kuut is un niks se tuun het mit was xlecht is. ₂₀Un Kot, unser kwel fon friite, tuut klaych Satanas fertreete unich ayre fiis.

Tas ti knaate fon Unser Hër Yeesus mit aych playpt!

₂₁Timoteus, mayne aarwats khameraate, xikt pekriisunge fer aych. Lusius, Jason un Sosiipater, mayn lantlayt, xike aach pekriisunge.

₂₂Ich, Tërsius, woo tee priif kexrip hon woo Phaulus fer mich tiktaat kemach hot, xike aach pekriisunge fer aych.

₂₃Kayus, pay weem ich in te khost sin, un in welche haus sich ti khërich treft, xikt aych aach pekriisunge. Erastus, te xtats kaseerer, un unser pruuter Qwarto xike aach kriise. ₂₄Tas te knaate fon unser Hër Yeesus Kristus pay aych al sin sol. Aamen.

₂₅Keloopt un ketankt say Kot! Wayl eyer hot ti macht fer aych fest im klaawe hale, tëm noo te ewankeelium woo ich aan saan, was mënt, ti mensaaj iwich Yeesus Kristus. Un aach tëm noo ti rewelatsioon iwer ti woerheet woo in kehëmnis nii tefoer aus kesaat kep waar. ₂₆Awer, tii woerheet is yets reweleyert kep torich tas woo ti profëte kexrip hon. Un, torich em eewiche Hërkot sayn ortnung, hot tii sich pekhant kemach in ale natsioone, tas ale foleke traan klaawe un se noo keen.

₂₇Kloor fer imer fer te eensichste un wisente Kot, torich Yeesus Kristus! Aamen!