1Tëm noo hot te finefte ëngel sayn trompet keploost, un ich hon en xtërn kesiin woo fom himel uf ti eyert kefal waar, un ti xtërn hot te xlisel fom apismus kriit. 2Ti xtërn hot te prune fom apismus uf kemach, un fon tëm is en tamp raus khom, wii wën es fon en kroose prën oofe weyer. Un ti sun un ti luft sin tunkel kep mit tëm tamp woo fom apismus raus am khome waar. 3Aus tëm tamp waare haayxreker raus am khome, woo runer uf ti eyert kefloo sin un hon ti selwich macht kriit woo ti skorpioone hon. 4Is kesaat kep tas ti haayxreker khee xaate mache solte fer tas kraas, net fer ti peem ore anere planse; khonte noore wee mache ti mënxe woo net Hërkot sayne sinal an te xtërn hate. 5Ti haayxreker hon khee erlaupnis kriit fer mënxe umpringe; solte se ploos kweele finef moonate lang. Ti phayn woo se tëne aan ketuun hon in tee tortur waar wii en skorpioon xtich. 6In tëne finef moonate wëre ti layt te toot suuche, awer tuun es net fine; wëre xtërwe wole, awer te toot tuut fon tëne ausrayse.
7Ti haayxreker hon auskesiin wii kayl fërtich fer ti patalye. Uf tëne sayn khep waar etwas eenlich wii en koltne kroon, un tëne sayn kesicht waar wii tas kesicht fon en mënx. 8Tëne sayn hoer waare wii fraae hoer, un ti tseen waare wii te leepe sayn tseen. 9Sayn prust xilte waare eenlich mit ayse xilte, un te ratau fon tëne sayn flite waar wii ween mit fiil kayl ketsoo wën se fer ti patalye laafe. 10Ti haayxreker hate xwëns un angle soo wii te skorpioon sayn, un waar mit te xwëns woo se ti macht hate fer ti layt wee mache iwer finef moonate lang. 11Tii hate en kheenich woo se rechiert hat, woo te ëngel waar woo te apismus uf past. Tëm sayne naame in hepreyix is Abadom un in kriichix is Apolion (tas petayt “Te Fernichter”).
12Te eyerxte “ay” is xon rom. Noo tëm sole noch tswaay anere “ays” khome.
13Tan hot de sekste ëngel sayn trompet keploost un ich hon en xtim keheyert woo am khome waar fon te fier eke fom koltne altar woo foer Hërkot is. 14Un fer te sekste ëngel, woo ti trompet in te hënt hat, saat ti xtim:
— Los ti fier ëngle loos woo aankepun sin ticth am kroose flus Eufrates!
15Ti fier ëngle sin los kelos kep. Tii waare prepareyert fer tii xtun, taach, moonat un yoer fer tas trite teel fon te mënxheet umpringe. 16Un is mich kesaat kep tas ti soltaate mit kayl tswaay hunert milioone weere. 17In mayn wisioon hon ich ti kayl kesiin un sayn riter. Ti riter hate uf te prust xilte root wii fayer, plau wii eetel xteen un kelep wii xweefel. Te khop fon te kayl waar wii te khop fon leepe un fon tëne sayn maul is fayer, tamp un xweefel raus khom. 18Tas trite teel fon te mënxheet is toot kemach kep fon tën tray plaake: tas fayer, te tamp un te xweefel woo aus en maul fon te kayl khom is. 19Wayl ti macht fon te kayl is an tëne sayn maul un aach am xwans. Te xwans waar wii en xlang mit te khop am xpits un mit tëm hon ti kayl tas folek wee kemach.
20Te rest fon te mënxheet, was mënt, al tii woo net toot kemach kep sin fon tëne plaake, hon net in xtich kelos was se fërtich keprung hate mit sayn aychne hënt: tii hon net uf keheyert ti temoone atoreerere un sayn koltne itoole, fon silwer, fon pronse, fon xteen un hols, woo net siin khëne, net heere, net keen. 21Hon sich aach net keroyert fon sayn toot krimes, net fon sayn hekseray, net fon sayn seksual imoraliteet, net fon sayn xteeleray.
