Te ëngel un tas pichelche
1Tan hon ich en anere xtarke ëngel kesiin, woo fom himel runer am khome waar. Sayn tsaych waar en wolek, un er hat en reenpoo uf em khop. Sayn kesicht waar wii ti sun, un ti peen waare wii fayer phayler. 2Te ëngel hat en ufne pichelche in te hant. Eyer hot te rechste fuus uf es meer kextelt un te linkse uf ti eyert. 3Un hot mit en aarich xtarek xtim kexraayt, wii te leepe sayn krume. Noo tëm sayne xraay, hon ti siwe tunere keantwort mit en xtarke krach. 4Im momënt woo se kexproch hon, wolt ich xraywe, awer hon en xtim fom himel keheyert, woo saat:
— Hal tich ruich iwer was ti siwe tunere kesaat hon. Tuu niks xraywe.
5Tëm noo hot te ëngel woo ich xteen kesiin hat uf em meer un uf te eyert ti rechts hant noo em himel kehoop 6un hat en xwoorung kemach in Hërkots naame, woo fer ti kans eewichkheet leept, woo te himel, ti eyert un tas meer un ales was in tëne is ketsoo hat. Ti xwoorung waar tas:
— Es tuut net mee lang taure. 7Wan te sipte ëngel ti trompet ploose tuut, wërt Hërkot sayne sekrëte plaan in hale, wii eyer aan kesaat hot fer sayn tiiner, ti profëte.
8Tan hot ti xtim fom himel, woo ich keheyert hat, noch mool mit mich kexproch, am saan:
— Kee pis pay te ëngel woo uf em meer un uf te eyert xteet un hool tas ufne puch woo tee in te hant hat.
9Ich sin kang un hon tas pichelche fer te ëngel ferlangt, un tee saat fer mich:
— Hool tas pichelche un tuu tas ese. In tayne maache kept tee sauer, awer in tayn munt wërt tas siis wii hoonich.
10Tan hon ich tas pichelche kehool fom ëngel sayn hant un hon em kes, un in mayn munt waar tas siis wii hoonich. Awer, wan ich en xon uner kexlikt hat, is mayne maache sauer kep. 11Tan hon se mich kesaat:
— Tuu must noch mool em Hërkot sayn mensaaj aan saan iwich ti fiile natsioone, folekeh, xprooche un kheeniche.
