Apokalipse 11

₁Tëm noo hon ich en linyaal fer se mese kriit, eenlich mit en fix xteke, un tan hon se mich kesaat:

— Xtay uf, hool ti moos fon Hërkot sayne Thëmpel un fom altar un tseel ti mënxe woo tort am atoreere sin. ₂Awer, prauchst net te ausere hoof fom Thëmpel mese, wayl tee hoof fer ti pakaane ap kep wërt, ti pakaane woo in ti Haylich Xtat trample iwer tswaay un fërtsich moonate. ₃Ich wërt mayn tswaay tsayer xike, keklayt mit krope xtof un tii wëre Hërkot sayn mensaaj aan saan iwer tausent, tswaay hunert un sechtsich taache.

₄Ti tswaay tsayer sin ti tswaay oliiwe peem un ti tswaay khërtse xtëner woo foer em Hër fon te kans welt xteen. ₅Wën sayn faynte fersuuche tii xlecht pehantle, khomt fayer aus em munt fon tëne tswaay tsayer un tuut se fernichte. Soo, weyer se xlecht pehantle wil, mus umkeprung kewe. ₆Tii hon autoriteet fer te himel tsuu mache tas es net reene tuut iwer ti tsayt woo se Hërkot sayn mensaaj aan saan. Hon aach autoriteet iwer es waser tas es sich in pluut transformeyert. Hon noch autoriteet fer ti eyert wee mache mit aler sorte fon plaake, soo oft wii se wole.

₇Wën ti tswaay tsayer fërtich kewe mit sayn mensaaj aan saan, tuut te monster woo fon apismus khomt keeche tii khëmfe. Tee tuut kewine un tuut tii umpringe, ₈un tëne sayn khërwer playwe in te haupst xtroos fon te kroos xtat woo tëne sayne Hër pekraytst kep waar. Te simpoolixe naame fon te xtat is Sotooma ore Ejipt. ₉Iwer tray un halwe taache, tuun ti foleke fon ale natsioone, xtame, xprooche un rase tii tswaay khërwer aan kuke un net lose tas se peërticht kewe. ₁₀Ti foleke fon te eyert wëre hërlich kewe mit em toot fon tëne tswaay tsayer. Tuu fayre un kexënker xike ëne fer te anere wayl ti tswaay profëte fiil laytung fer ti mënxheet keprung hon. ₁₁Awer noo tëne tray un halwe taache is en leewe hauch fon Hërkot khom un is in tëne rin kang, un tii sin uf kextii. Un ale layt woo se kesiin hon, hon en xreklich pang kriit. ₁₂Tan hon ti tswaay profëte en xtarek xtim keheyert, woo fom himel khomt un tëne saat:

— Khomt hier ruf!

Soo lang wii sayn faynte am kuke waare, sin ti tswaay profëte ruf noo em himel kextii uf en wolke. ₁₃In tëm momënt is en kewaltiche eyert xuter paseyert. Ti tseent tayl fon te xtat is fernicht kang un siwe tausent mënxe sin kextorep. Ti anere hon aarich fiil pang kriit un Hërkot fom himel sayn kroosheet keloopt.

₁₄Te tswete “ay” is xon rom. Awer, kukt! Te trite “ay” khomt klaych.

₁₅Tan hot te sipte ëngel sayn trompët keploost, un laute xtime im himel, am saan:

— Ti macht fer ti welt kowerneere keheyert yets tsu Hërkot, woo unser Hër is un tsum Kristus woo eyer aus kesuucht hot. Un Hërkot wërt in ale eewichkheet rechiire!

₁₆Tan hon ti fier un tswansich fiirer, woo uf sayn troone kesitst hon foer Hërkot, sich kekniit, hon sayn kesicht uf te potem ketuun un hon Hërkot atoreyert, ₁₇am saan:

₁₉Tan hot Hërkot sayne thëmpel woo im himel is sich uf kemach, un ti ark fon te alians is tort trin kesiin kep. Un hot keplitst, kerumpelt un ketunert, en eyert xuter un en xtarke xloose xtorem is paseyert.