Apokalipse 8

₁Wii te Xoof te sipte selo keproch hot, hot te himel sich ruich kehal iwer unkefeyer en halep xtun. ₂Tan hon ich ti siwe ëngle kesiin woo foer Hërkot kextan hon, un tii hon siwe trompete kriit.

₃En anere ëngel is mit en koltne wase khom woo trin insëns keprënt kept un is neewich em altar xteen keplip. Tee hot fiil insëns kriit fer pay ti kepeete fom kanse Hërkots folek tuun un aan piite uf em koltne altar woo foer em troon is. ₄Un fom ëngel sayn hënt is te tamp fom keprënte insëns ruf kang noo Hërkot, mit te kepeete fom Hërkots folek. ₅Tan hot te ëngel te insëns wase kehool, hot em kefilt mit em fayer fom altar un hot tas iwer ti eyert kexmis. Tan hot es ketunert, kekracht, keplitst un en eyert xuter kep.

₆Klaych tëm noo hon ti siwe ëngle woo ti siwe trompete hate sich prepareyert fer se ploose.

₇Te eyerxte ëngel hot sayn trompet keploost, un en reen fon xteen un fayer is uf ti eyert kexmis kep, fermixt mit pluut. Un tas trite teel fon te eyert, fon te peem un ale kriin kraut is fernicht kep torich em fayer.

₈Tëm noo hot te tswete ëngel sayn trompet keploost, un en tings eenlich mit en kroose përich, woo fayer am fange waar, is ins meer kexmis kep. Tas trite teel fom meer hot sich in pluut transformeyert, ₉en tritel fon te meer kriatuure is kaput kang, un en tritel fon ale poote un poote sin fernicht kang.

₁₀Tan hot te trite ëngel sayn trompet keploost, un en kroos xtërn, am prëne wii en fakel, is fom himel kefal uf tas trite teel fon te fluse un uf ti waser kwele. ₁₁Te naame fon tee xtërn is Piterlichkheet. Tas trite teel fom waser is piter kep, un tesweche sin fiil layt kextorep wayl se fon tëm waser ketrunk hon.

₁₂Tan hot te fierte ëngel sayn trompet keploost, un en tritel fon te sun, fom moont un fon te xtërneis wee kemach kep, soo tas se en tritel fon sayne klans ferloer hon. Waar khee licht iwer en tritel fom taach un aach fon te nacht.

₁₃Tëm noo hon ich kekukt un hon en aatler kesiin, woo kans hooch am himel am fliye waar. Un ich hon te aatler keheyert saan mit en xtarke xtim:

— Ay fon aych! Ay fon aych! Ay fon aych woo uf te eyert am woone sayt wan te klank fon te trompete woo ti anere tray ëngle xpiile sich heere macht!