Ti hunert fier un fërtsich tausent fom folek fon Israël
1Tëm noo hon ich fier ëngle kesiin xteen uf te fier eke fon te eyert. Ti waare ti fier winte fon te eyert fest am hale tas khee ëne wint iwer ti eyert ploose solt, net mool iwer tas meer, net iwer khee ëne paam. 2Tan hon ich en anere ëngel kesiin, woo uf te oost sayt ruf khom is un hat em leewente Hërkot sayne xtëmpel in te hant. Te hot mit kans laut xtarek xtim kexraayt fer ti fier ëngle woo ti macht kriit hate fer xaate se mache uf te eyert un uf em meer. 3Te ëngel saat:
— Macht khee xaate uf te eyert, net uf em meer, net an te peem, pis mer ti xtërn fon Hërkot sayn tiiner markeere mit em sinal.
4Tan is mich te numer kesaat kep fon tëne woo markeyert kep waare: hunert fier un fërtsich tausent. Tii hon tsu ale xtame fom israelite folek keheyert. 5-8tswelef tausent fon yeete xtam: fon Yutaa, Ruben, Gade, Aser, Naftali, Manasës, Simeon, Levi, Isakar, Sebulon, Yoosef un Benyamin.
Tas kroose folek
9Tëm noo hon ich kekukt un hon soo en kroos folek kesiin, tas nimant tseele khont. Waare fon ale natsioone, xtame, foleke un xprooche. Hon kextan foer em Xoof sayne troon, mit ways tsaych keklayt, un hate palme in te hënt. 10Un hon in hat xtim kexraayt:
— Fon unser Hërkot, woo uf em troon sitst, un fom Xoof khomt unser retung.
11Ale ëngle hon kextan um troon rom, um ti mayster rom un fon te fier leewente kriatuure. Tan hon se sich uf te potem kexmis foer em troon, sayn kesicht uf te potem ketuun un hon Hërkot atoreyert, 12am saan:
— Aamen! Tsu unser Hërkot keheere fer imer te loop, ti kloor, ti wisheet, ti tankpaarkheet, ti eere, ti macht un ti kraft! Aamen!
13Ëne fon te mayster hot mich kefroot:
— Weyer sin tii woo mit ways tsaych keklayt sin? Fon woo sin ti khom?
14Ich hon keantwort:
— Ich wees net. Teyer weest tas!
Tan saat eyer mich:
— Tas sin tii woo ti kroos xwiirichkheet torich kang sin in sicherheet. Sin ti layt woo sayn klaytung im Xoof sayn pluut kewex hon, un tii sin ways kep. 15Tesweche xteen tii foer Hërkot sayne troon un tuun em taache un nacht tiine im sayne thëmpel. Un tee woo uf em troon sitst tuut se xitse mit sayn presëns. 16Ti wëre nii mee hunger ore torxt hon. Net mool ti sun ore aner xtarek hits khan tëne xaate tuun. 17Wayl te Xoof, woo in te mite fom troon is, wërt tëne layt sayne xeefer sin un tuut se fiire pis an kwele fon waser woo es leewe kept. Un Hërkot tuut ale treene fon tëne sayn aue ap trokne.
