Ti sinale
1Tan hon ich te Xoof kesiin te eyrxte fon te siwe selos preche un hon een fon te fier leewente kriatuure keheyert saan mit soo en xtarek xtim wii tas rumple fon en toner:
— Khom!
2Ich hon kekukt un hon en wayse kaul kesiin. Te riter hat en fayl pooche kehat un hon tëm en kheenich kroon kep. Un tee is wayter kang am kewine un am konkisteere.
3Tëm noo hot te Xoof te tswete selo keproch. Un ich hon ti tswet leewent kriatur keheyert saan:
— Khom!
4Tan is en anere kaul raus khom, woo root waar. Sayne riter hot ti macht kriit fer te kriich pringe fer ti welt tas ti mënxe ëne ti anere toot mache teere. Un tee hat en kroos xwaart kriit.
5Tan hot te Xoof te trite sinal keproch. Un ich hon ti trit leewent kriatur keheyert saan:
— Khom!
Ich hon kekukt un hon en xwartse kaul kesiin. Sayne riter hat en woo in te hant kehat. 6Ich hon keheyert was sich wii en xtim aan keheyert hot, woo fon te mite fon te fier leewente kriatuure am khome waar un am saan waar:
— Halep khilo wayts khost was teyer in en kanse taach aarwat fertiine tuut; un en un halve khilo khërxte khost tas selwiche. Un tuut khee waser in te wayn rin mixe, un net te eel falx mache.
7Tëm noo hot te Xoof te fierte selo keproch. Un ich hon ti fiert leewent kriatur keheyert saan:
— Khom!
8Ich hon kekukt un hon en hele kaul kesiin. Sayne riter heest Toot, un ti toote welt is em noo kang. Tii hon ti macht kriit iwer ti fiert teel fon te welt, fer toot se mache torich kriiche, hunger, krankheete un wilt fii.
9Tan hot te Xoof te finefte selo keproch. Un unich em altar hon ich ti seele kesiin fon tëne woo toot kemach kep waare wayl se Hërkot sayn mensaaj aan kesaat hate un leaal keplip waare in sayne tsayer. 10Ti hon mit xtarek xtim kexraayt:
— Oh, Almechtiche, hayliche un waare Kot! Wan tuust tuu julkeere un konteneere tii woo uf te eyert uns toot kemach hon?
11Yeete ëne fon tëne hot en ways klaytung kriit. Un is tëne kesaat kep tas se solte noch en pisye ruue, pis te numer fon sayn khameraate in Kristus sayn aarwat sich kompleteere teet, khameraate woo sayn priiter waare un woo toot kemach keepte wii sii.
12Tëm noo hon ich kesiin te Xoof te sekste selo uf preche. Too hot es en kewaltiche eyert xuter kep, ti sun is xwarts kep wii en trauer tsaych, un te moont is kans root kep wii pluut. 13Ti xtërne sin fom himel kefal uf ti eyert, wii ti kriine fayche ap fale fom paam woo kexitelt kept fom xtarke wint. 14Te himel is ferxwun wii en papier rol woo sich noch mool wikelt, un ale përiche un insle sin fon sayn plats kewexelt kep. 15Tan hon ti kheeniche fon te kans welt, ti kowerneyer un ti militeyer xëfe, ti rayche un ti mechtiche un ale anere layt, sklaawe un frye, sich ferxtekelt in te hoole un unich ti felse fon te përiche. 16Un waare am xraaye fer ti përiche un fer ti felse:
— Falt uf uns un ferxtekelt uns fon te aue fon tëm woo uf em troon sitst un xitst uns fon te wuut fom Xoof! 17Wayl te kroose taach fon tëne sayn wuut is xon khom, un weyer khan ti aus hale?
