Te puch rol un te Xoof
1In te reechts hant fon tëm woo uf em troon kesitst hot hon ich en puch kesiin in rol form. Waar uf te tswaay sayte kexrip un mit siwe selos tsuu kekleept. 2Ich hon aach en xtarke ëngel kesiin, woo in hat xtim am frooe waar:
— Weyer is es weyert ti selos preche un tas puch uf mache?
3Awer waar nimant, net im himel net uf te eyert, woo tas puch uf mache khënt un siin was too trin kexrip waar. 4Ich waar fiil am prile wayl nimant kefun kep waar fer tas puch uf mache ore fer se kuke was too trin kexrip waar. 5Tan hot ëne fon te fiirer mich kesaat: — Net prile. Kuk! Tas Leep fom xtam Yuta, te famoose nookhomer fon Dawii, hot kewun un khan ti siwe sinale ferpreche un tas puch uf mache.
6Tan hon ich en Xoof kesiin xteen in te mite fom troon, un ti fier leewente kriature un ti mayster hon trum rom kextan. Hot auskesiin tas te Xoof kaput kemach kep waar. Tee hat siwe hërner un siwe aue, was ti siwe kayste fon Hërkot waare woo noo te kans welt kexikt kep waare. 7Te Xoof is kang un hot tas puch woo in te rechts hant waar fon tëm woo uf em troon kesitst hot. 8Wan eyer tas kemach hat, sin ti fier leewente kriature un ti fier un tswansich fiirer uf kniye kefal foer tëm. Yeete ëne hat en harp in ti hënt un phaar koltne kheliche fol mit wayrauch, woo ti kepeete sin fom Hërkots folek. 9Tii hon en nay kesang kesung:
“Tuu pist es weyert tas puch hoole un ti selos preche.
Wayl tuu waarst toot kemach kep am krayts
un, torich tayne toot, host tuu fer Hërkot layt khaaf
fon ale xtame, xprooche, natsioone un foleke.
10Tuu host kemach tas tii layt en raych fon priister weere
woo unser Hërkot tiine;
un tii tuun ti kans welt kowerneere.”
11Ich hon noch mool kekukt un hon fiil ëngle keheyert, milioone un milioone fon tëne! Hon um te troon kextan, um ti fier leewente kriature un um ti fiirer 12un hon mit xtarek xtim kesung:
“Te Xoof woo toot kemach kep is
is es weyert fer macht kriin,
raychtum, wisheet un kraft,
eere, kloor un loop.”
13Tan hon ich ale kriature woo es im himel kept, uf te eyert, unich te eyert un im meer, tas mënt, ale kriature fom Uniwërs, woo am singe waare:
“Fer tee woo uf em troon sitst un fer te Xoof keheere te loop,
ti eere, ti kloor un ti macht fer ale eewichkheet!”
14Ti fier leewente kriature hon keantwort: “Aamen!” Un ti fiirer sin uf ti kniye kefal un hon em atoreyert.
