Atoreerung im himel
1Tëm noo, hat ich noch en aner wisioon un hon en ufne tier am himel kesiin. Un ti xtim, woo sich aankeheyert hot wii te klank fon en trompet, un woo xon tefoer mit mich kexproch hat, saat:
— Khom hier ruf, un ich tsayche tich was tëm noo paseere mus.
2In en momënt sin ich tomineyert kep fon Hërot sayne Kayst. Un too im himel waar en troon mit yemant truf am sitse. 3Sayn kesicht hot keklënst wii ti xteen fon jaspe un sartius klënse, un um sayne troon rom waar en reen pooche, woo keklënst hot wii en esmeralt. 4Um te troon rom waare anere fier un tswansich anere troone, woo fier un tswansich fiirer truf kesitst hon, mit ways tsaych keklayt un mit koltne kroone uf em khop. 5Fom troon sin plitse, kerumpels un tunere raus khom. Foer tëm waare siwe fakle aan kextoch, woo ti siwe kayste fon Hërkot sin. 6Un foer em troon waar etwas eenlich mit en klaas meer, hel wii kristal.
Um troon rom, uf yeete sayt, waare fier leewente kriature, petekt mit aue, fone un hine. 7Ti eyerxt fon tëne kriatuure hot aus kesiin wii en leep. Te tswete hot aus kesiin wii en xtier. Te trite hat es kesicht wii en mënx. Un te fierte hot aus kesiin wii em aatler am fliye. 8Yeete een fon tëne fier leewente kriature hat seks flite, woo ketekt waare mit aue uf te tswaay sayte. Un taache un nacht hon se net uf keheyert soo se singe:
“Haylich, haylich, haylich is te Hër Kot, te Almechtiche,
woo waar, woo is un woo khomt.”
9Yeetes mool woo ti fier leewente kriature ti kloor, eere un tank liite kesung hon fer tee woo uf em troon sitst un fer ale eewichkheet lewe tuut, 10sin ti fier un tswansich fiirer uf kniye kefal foer tëm un hon em atoreyert. Hon sayn kroone foer te troon kexmis un saate:
11“Unser Hër un unser Kot!
Tuu pist es weyert tas ti kloor, ti eere un macht tich kep wërt,
wayl hast ale tings ketsoo;
torich tayne wile sin se ketsoo kep un eksisteere.”
