Apokalipse 20

₁Tan hon ich en ëngel kesiin fom himel runer khome woo te xlisel fom apismus in te hënt hat un en xweyer khet. ₂Te hot te trakon kekrif, ti alt xlang woo te Taywel ore Satanaas is, un hot em aan kepun fer tausent yoore. ₃Tan hot te ëngel te Taywel in te apismus kexmis un hot ti tier kexlos un en xlos traan kemach tas tee net mee ti natsioone hinerkeen khënt pis ti tausent yoore rom këngte. Noo tëne tauset yoore is es neetich tas tee loos kelos kept iwer en khorts tsayt.

₄Klaych tëm noo hon ich phaar troone kesiin, un tii woo truf kesitst hon, hon ti macht kriit fer se julkeere. Hon aach ti seele kesiin fon te mënxe woo umkeprung kep waare wayl se Hërkot sayn mensaaj aan kesaat hate un ti woerheet woo Yeesus reweleyert hot. Tii hate net te monster atoreyert kehat net mool sayn imaaje, hate net sayne sinal an ti xtërn kemach kriit net mool uf ti hant. Tii layt sin noch mool peleept kep un hon mit Yeesus rechiert iwer tii tausent yoore. ₅Ti anere toote sin net peleept kep pis ti tausent yoore ans ën khom sin. Tas is ti eyerxt peleepung. ₆Kliklich un keseechent ti layt woo tepay khome in tee eyerxt peleepung, wayl te tswete toot hot khee macht iwer tii! Tii wëre Hërkot un Kristus tiine als priister un tuun mit tëm rechiire iwer tausent yoore.

₇Wan ti tausent yoore ans ën khome, kept Satanaas loos kelos fon sayn kefëngnis ₈un keet raus fer ti foleke fon ale natsioone fon te welt hinerkeen, tas mënt, Kook un Makook. Satanaas tuut se samle fer ti patalye, un ti wëre soo fiil sin wii ti sant khërner am rant fom meer.

₉Ti hon sich iwer ti welt ferxtraut un hon em Hërkot sayn folek sayne akampamënt umkekrayst un ti xtat woo eyer liipt, awer en fayer is fom himel runer khom un hot se fernicht. ₁₀Tan is te Taywel, woo se hinerkang hat, in ti fayer un xweefel lakoo kexmis kep, woo te monster un te falxe profët xon rin kexmis kep waare. Un tort kewe se kekweelt fer ale eewichkheet, im taach un nachts.

₁₁Tan hon ich en kroose wayse troon kesiin un tee woo truf kesitst hot. Ti eyert un te himel sin auskeris fon sayn presëns un sin net mee se siin kriit. ₁₂Hon aach ti toote kesiin, soo ti importante wii ti keringe, woo kextan hon foer em troon. Picher sin uf kemach kep, un aach en aner puch is uf kemach kep, tas Puch fom Leewe. Ti toote sin julkeyert kep tëm noo mit was yeete ëne fërtich keprung hat, soo wii in te picher kexrip waar. ₁₃Too hot tas meer ti toote ap kep woo too kewees waare. Te toot un ti welt fon te toote hon aach ap kep tii woo tort waare. Un al sin julkeyert kep tëm noo mit was yeete ëne ketuun hat. ₁₄Tan sin te toot un ti welt fon te toote in ti fayer lakoo kexmis kep. Ti fayer lakoo is te tswete toot. ₁₅Weyer sayne naame net im Leewe Puch kexrip hat is in ti fayer lakoo kexmis kep.