Apokalipse 19

₁Tëm noo hon ich en xtarek xtim im himel keheyert wii wën es en kroos folek weyer, woo saat:

— Aleluya! Ti retung, ti kloor un ti macht keheere tsu unser Hërkot! ₂Tëm sayn julkamënte sin fol woerheet un sin kerechtich. Tee hot ti famoos huer konteneyert woo ti eyert fertorept hot mit sayn imoraliteet. Hërkot hot se kextrooft wayl sii hat tëm sayn tiiner umkeprung kehat.

₃Un tas folek saat noch mool:

— Aleluya! Te tamp fon te flame fon te kroos xtat keet ruf fer imer.

₄Tan sin ti fier un tswansich fiirer un ti fier leewente kriatuure uf kniye kefal un hon Hërkot atoreyert, woo uf em troon kesitst hot, un hon kesaat:

— Aamen! Aleluya!

₅Tan hot en xtim fom troon kexproch:

— Loopt unser Kot, al sayn tiiner, al tii woo an iim klaawe, soo ti importante layt wii ti keweenliche.

₆Too hon ich en ratau keheyert wii en kroos folek, wii te ratau fon en kroos waser fal ore wii xtarke tunere, woo saat:

— Aleluya! Wayl te Hër, unser Kot, te Almechtiche, is Kheenich! ₇Los uns froo kewe un kliklich! Los uns sayn kloor loope! Wayl ti uertsayt khom is fom hochtsayts fest fom Xoof un tëm sayn praut hot sich xon prepareyert. ₈Tëm is te fayneste layn kep waar, klënsiche un phuure layn fer sich se klayte.

Te layn sin ti kuute aktsioone fon Hërkot sayn folek.

₉Tan hot te ëngel mich kesaat:

— Xrayp tas: “Kliklich tii woo in kelaat kep sin fer tas hochtsayts fest fom Xoof!”

Un te ëngel saat noch:

— Tas sin Hërkot sayn wërter fol woerheet.

₁₀Tan hon ich mich am ëngel sayn fiis kekniit fer iim atoreere, awer tee saat mich:

— Mach tas net! Wayl ich sin Hërkot sayne tiiner, soo wii tuu un tayn priiter sayt woo wayter leaal playpt uf ti woerheet woo Yeesus reweleyert hot. Tuu Hërkot atoreere!

Wayl ti woerheet woo Yeesus reweleyert hot is ti mensaaj woo te Kayst ap kept fer ti profëte.

₁₁Klaych tëm noo hon ich te himel uf kesiin un en wayse kaul is tsum foerxayn khom. Tëm sayne riter is Waarent un Leaal kenënt. Eyer julkeyert un khëmft mit justis. ₁₂Sayn aue waare wii fayer flame un eyer hat fiile kroone uf em khop. Waar en naame an em kexrip woo nimant khëne tuut, sonst eyer selepst. ₁₃Sayne mantel waar ketekt mit pluut. Sayne naame is “Kotes Wort”. ₁₄Ti himlixe militeere sin em noo kang, wayse kayl am rayte un keklayt mit wayse un phuure layn. ₁₅Fon sayn munt waar en xaref xwaart raus am khome, mit was eyer ti natsioone ap kewine tuut. Tee tuut se kowerneere mit en ayse xtang un tuut ti trauwe fertreete im thanke fom furioos wuut fom Almechtiche Hërkot. ₁₆Uf tëm sayne mantel un am peen waar tee naame kexrip: “Kheenich fon te kheeniche un Hër fon te hëre.”

₁₇Tan hon ich en ëngel kesiin woo uf te sun kextan hot. Tee hot mit xtarek xtim kexraayt, tas am saan fer ti feel woo kans hooch am fliye waare:

— Khomt un fersamelt aych fer Hërkot sayne kroose panket! ₁₈Khomt un est tas flayx fon kheeniche, jeneraale un fon soltaate, fon kayl un fon te riter un fon ale layt, sklaawe ore fraye, importante ore kewenliche.

₁₉Tëm noo hon ich te monster kesiin un ti kheeniche fon te kans welt un tëne sayn militeyere fersamelt fer se khëmfe keeche tee woo te kaul am rayte waar un keeche tëm sayne militeyer. ₂₀Te monster is kefang kep mit em falxe profët, woo xreklich tings kemach hat in tëm sayn presëns. Mit tëm tings hat eyer hinerkang kehat tii woo em monster sayne sinal hate un tii woo ti imaaj fom monster atoreyert hate. Te monster un te falxe profët sin leewent in ti fayer lakoo kexmis kep woo mit xweefel prëne tuut. ₂₁Tëne sayn militeyere sin toot kemach kep mit te xwaart woo tëm aus em munt khom waar fon tëm woo te wayse kaul am rayte waar. Un aler feel hon fon tëne sayn flayx kes pis se sat waare.