Te unerkang fon Papiloonia
1Tëm noo hon ich en anere ëngel kesiin fom himel runer am khome. Eyer hat en kroos macht, un sayne xayn hot ti kans eyert kelaycht. 2Un hot kexraayt in hat xtim:
— Is kefal! Ti kroos Papiloonia is kefal! Yets weyer too leept sin ti temoone un ale xlechte kayste. Aler sorte trekiche un apxayliche feel un tiire leewe tort. 3Wayl ale natsioone hon fon tëm sayne wayn ketrunk, te xtarke wayn fon sayn imoral wunxe. Ti kheeniche fon te kans welt hon seksual imoraliteete mit tëm kemach un ti kexefts layt fon tee welt sin raych kep torich ti trekiche seksual praktise fon te huer.
4Tan hon ich en aner xtim fom himel keheyert, woo saat:
— Kee aus tee xtat, mayn folek!
Keet al raus fer khee teel hale an sayn sinte
un fer net tepay sin an sayn xtroofe!
5Wayl sayn sinte sin uf haufe pis an te himel
un Hërkot erinert sich an sayn xlechtichkheete.
6Kept tëm tas selwiche woo tii aych kep hot;
petsaalt topelt soo fiil was tii kemach hot.
Filt tëm sayne khelich mit ketrënk tswaay mool xtërker
wii tas ketrënk woo sii fer aych prepareyert hot.
7Kept tëm soo fiil layte un traurichkheet
soo fiil wii sii sich lux un kloor selepst kep hot.
Wayl sii tënkt soo: “Ich sitse hier wii en kheenichiin!
Sin khee witfraa un nii mee mache ich layte mit!”
8Tesweche, in en selwiche taach, tuun tii plaake uf se fale:
krankheete, phayn un hunger un sii wërt ferprënt im fayer.
Wayl te Hër Kot, woo se julkeyert, hot kroos macht.
9Ti kheeniche fon te kans welt woo teel kenom hon an sayn imoraliteet un an sayn koruptsioon wëre xraaye un prile wan se te tamp fon sayn fayer siin. 10Ti playwe wayt wech wayl se pang hon tayl se nëme am xtroof woo sii layte sol, un saan:
— Ay fon tich! Ay fon tich, Papiloonia,
kroos un mechtich xtat!
In ploos een xtun
pist tuu xon kextrooft kep!
11Ti kexefts layt fon te kans welt xraaye aach un tuun sich peklaache weche tëm wayl nimant mee tëne iire protukte khaafe tuut. 12Nimant khaaft sayn kolt, silwer, eetel xteen un phërle; net mool sayne fayne layn, sayn purpur, sayn sayte xtof un sayn root wol; aach khee raare holz ore khee opjëkte fon elfepeen ore tayer holz, fon pronse, ayse un marmor; 13net mool tsimit, salep, insëns, mira ore parfume. Nimant khaaft sayne wayn, eel, waytse meel ore khërner; net mool rints fii un xeef, kayl un ween, net sklaawe ore anere mënxe. 14Ti kexefts layt saan fer ti xtat:
— Ales tas kuutes woos tuu soo fiil wolst is ferxwun un tuu host ti kans raychtum un naame ferloer fer imer un kriist tas nii mee tsurik.
15Un ti kexefts layt woo raych kep sin weche te kexefter woo se in tee xtat kemach hon, playwe wayt wech, mit pang tas se kextrooft kewe mit tëm. Tii wëre xraaye un soo sich peklaache:
16— Ay fon te kroos xtat! Ay fon te xtat woo keklayt waar mit em fayneste layn, mit purpur un root wol un sich kexmikt hat mit kolt ornamënte, mit eetel xteen un mit phërle! 17In ploos een xtun hot sii sayn kans raychtum ferloer!
Ale kapitan fon poote un ale pasajiers, meer mëner un anere woo es leewe fertiine uf em meer sin wayt wech keplip. 18Tan, te tamp fom fayer fon te xtat am siin, hon se kexraayt:
— Nii hot es en xtat kep wii tii kroos xtat!
19In en sinal fon traurichkheet, hon se xtaap uf sayne khop kextraut, hon keprilt un hon soo kexraayt:
— Ay fon te kroos xtat! Ay fon te xtat woo, torich sayn kroos raychtum, al tii woo poote uf em meer hate raych kep sin! Un in noore een xtun hot se ales ferloer!
20Frayt aych, oh himel, weche te fernichtung fon tee xtat! Frayt aych, Hërkots folek, aphostle un profëte! Wayl Hërkot hot se konteneyert weche was sii ketuun hot keeche aych!
21Tan hot en xtarke ëngel en xteen kehoop soo kroos wii en miile xteen un hot em ins meer kexmis. Un saat:
— Soo is es tas ti kroos xtat Papiloon wech kexmis kept mit kewalt un nii mee kesiin kept. 22Ti musik fon te harfe, fleete un trompete xpiiler un ti xtime fon te singer wëre nii mee keheyert in tich, un nii mee kept en aarwater fon ale profitsioone aan ketrof, un nii mee kept te ratau fon te miil xteen too keheyert! 23In tich wërt nii mee tas licht fon en lamp xayne un nii mee wërt sich in tich ti xtim fon en praut phaar se heere kriin. Tayn kexefts layt waare ti xtërekste fon te welt, un mit hekseray host tuu ti kanse foleke fon te welt hinerkang.
24Ti kroos Papiloonia is kextrooft kep, wayl in tëm is tas pluut fon te profëte kefun kep, tas pluut fon Hërkot sayn folek un fon al tii woo umkeprung kep sin uf te eyert.
