Ti famoos huer un te monster
1Tan is ëne fon te siwe ëngle woo ti siwe kheliche hate mich saan khom:
— Khom, un ich wërt tich tsayche wii ti famoos huer kextrooft kept, ti kroos xtat woo ticht an fiil fluse kepaut is. 2Ti kheeniche fon te kans welt hon seksual imoraliteet mit tëm ketuun, un ti foleke fon te welt sin pesof kep mit em wayn fon sayn imoraliteet.
3Tan hot Hërkot sayne Kayst mich tomineyert, un te ëngel hot mich pis uf en tesërt kenom, woo ich en fraa kesiin hon en roote monster am rayte. Waare fiil plasfeeme uf em kexrip, un tee hat siwe khep un tseen hërner. 4Ti fraa hat en klayt mit purpur un fayer root farep aan un waar kexmikt mit kolt, eetel xteen un phërle. In te hant hat se en koltne khelich kehal fol wayn, woo sayn unaanxtëniche praktike un te trek fon sayn imoraliteet representeyert hon. 5Uf sayn xtërn waar en naame kexrip woo en sekrët petaytung hat: “Ti kroos Papiloonia, moter fon ale huure un fon ale imoraale mënxe fon te welt.” 6Tan hon ich kesiin tas ti fraa pesof waar mit em pluut fon Hërkot sayn folek un fon te mënxe woo umkeprung kep waare wayl se leal fer Yeesus kewees waare. Wii ich se kesiin hon, hon ich mich fiil ferwunert. 7Un te ëngel hot mich kefroot:
— Warom pist tuu soo ferwunert? Ich fertseele tich ti sekrët petaytung fon te fraa un te monster woo se traan tuut, tee woo siwe khep hot un tseen hërner. 8Te monster woos tuu kesiin host waar leewent, awer yets leept te nime. Te wërt witer uf xtaye fom apismus, un fon too khomt er raus, un wërt fernicht. Ti pewooner fon te eyert woo tsayt tas ti welt ketsoo kep waar net sayne naame in kexrip hon im Puch fom Leewe tuun sich ferwunere wën se te monster aan kuke. Te waar leewent; yets leept er nime, awer khomt noch mool tsum foerxayn.
9— Tas ferlangt wisheet un ferxtant: ti siwe khep sin siwe përiche woo ti fraa sitst. Ti sin aach siwe kheeniche: 10finef sin xon kextorep, eene is am kowerneere, un te anere is noch net tsum foerxayn khom. Un, wën te tsum foerxayn khome tuut, prauch te en khorts tsayt kowerneere. 11Un te monster woo xon leewent waar, woo awer yets nime leept, is te achte kheenich, woo teel is fon tëne eyerxte siwe un woo fernicht kept.
12— Ti tseen hërner woos tuu kesiin host sin tseen kheeniche woo noch net aankefang hon se kowerneere, awer wëre autoriteet kriin fer mit tëm monster ti kheenichlich macht hon iwer een xtun lang. 13Al ti tseen hon te selwiche opjektiif un kewe sayn macht un autoriteet fer te monster. 14Ti wëre keeche te Xoof khëmfe, un tee tuut se ap kewine wayl eyer te Hër fon te hëre is un te Kheenich fon te kheeniche. Un mit iim kewine sayn aanhënger, tii woo keruuf sin un leaal.
15Tan hot ëngel mich wayter kesaat:
— Tas waser woos tuu kesiin host, woo ti huer sitst, sin natsioone, foleke, rase un xprooche. 16Ti tseen hërner woos tuu kesiin host un te monster wëre ti huer hase. Tii tuun ales wech hoole was se hat un lose sii nakich. Tuun sayn flayx frese un tuun te rest im fayer ferprëne. 17Ti tseen kheeniche mache tas wayl Hërkot in tëne sayn hërts te wunx ketuun hot fer se mache was er wil. Soo, unich sich, tuun se pextime sayn autoriteet fer se kowerneere fer te monster ap kewe. Tas wërt paseere pis Hërkot sayn wërter sich in hale tuun.
18— Ti fraa woos tuu kesiin host is ti kroos xtat woo ti kheeniche fon te kans welt tomineere tuut.
