Ti kheliche fon Hërkot sayn wuut
1Tëm noo hon ich en xtarek xtim keheyert im thëmpel am xpreche, am saan fer ti siwe ëngle:
— Keet un tuut ti siwe kheliche fon Hërkot sayn wuut iwer ti eyert aus xite!
2Te eyerxte ëngel is kang un hot sayne khelich aus kexut iwer ti eyert. Xrekliche, ufne weeye sin raus khom an tëne woo te sinal fom monster hate un woo sayn imaaj atoreyert hate.
3Tan hot te tswete ëngel sayne khelich iwer tas meer kexut. Tas waser is wii pluut fon en toote mënx kep un aler leewente kriatuure fom meer sin kaput kang.
4Tan hot te trite ëngel sayne khelich iwer ti fluse un waser kwele kexut un ti hon sich in pluut transformeyert. 5Ich hon te ëngel woo autoriteet iwer es waser hot keheyert saan:
— Tuu pist kerechtich in tayn julkamënte, oh hayliche Hërkot, woo pist un woo waarst! 6Ti xlechte hon em Hërkot sayn folek un te profëte sayn pluut ferxut un, tesweche, host tuu tëne pluut kep fer se trinke. Tii sin am kriin was se fertiint hon.
7Tan hon ich en xtim keheyert woo fom altar am khome waar. Ti xtim saat:
— Oh, Hër Kot, Almechtiche! Tayn julkamënte sin wërklich woer un kerechtich!
8Tëm noo hot te fierte ëngel sayne khelich aus kexut iwer ti sun un tii hot erlaupnis kriit fer ti layt ferprëne mit fayer. 9Ti sin ferprënt kep mit tëm xrekliche fayer un hon Hërkot, woo autoriteet hot iwer ti plaake, sayne naame ferfluucht. Awer hon sich net keroyert fon sayn sinte, un hon net Hërkot sayn kloor keloopt.
10Tan hot te finefte ëngel sayne khelich iwer te troon fom monster aus kexut. Tunkelheet is iwer em monster sayne raych kefal un ti layt hon sich ti tsung kepis fom phayn 11un, weche sayn phayn un weeye, hon se te Hërkot fom himel ferfluucht. Awer hon net tas xlechte tings woo se am tuun waare inxtich kelos.
12Klaych tëm noo, hot te sekste ëngel sayne khelich in te kroose flus Eufrates kexut. Te flus is ketrokent fer weech uf mache fer ti kheeniche woo fom Orient am khome sin. 13Tan hon ich tray xlechte kayste kesiin woo auskesiin hon wii froxe, woo aus em maul fom trakon am khome waare, fom maul fom monster un fom maul fom falxe profët. 14Ti sin ti xlechte kayste woo wunere mache. Ti tray kayste keen ti kheeniche fon te kans welt uf suuche fer tii fersamle fer ti patalye fom kroose Taach fon Kot, te Almechtiche.
15Heyert! Ich khome wii en xpits puup. Kliklich tee woo wacht un sayn tsaych uf past fer net nakich too rom keen un sich net xeeme prauch unich te layt!
16Tëm noo hon ti kayste ti kheeniche fersamelt uf es plats woo in hepreyix “Armajeton” kenënt is.
17Un tsum letste, hot te sipte ëngel sayne khelich aus kexut in te luft. Tan is en xtarek xtim fom troon khom, im thëmpel, am saan:
— Is kemach!
18Hot keplitst, kerumpelt, ketunert un en kewaltiche eyert xuter is paseyert, soo kewaltich wii es noch nii kep hot tsayt tas ti mënxheet ketsoo kep waar. Waar te xlimste fon tëne al. 19Ti kroos xtat hot sich ferproch in tray xtiker un ti xtet fon ale natsioone sin fernicht kep. Hërkot hot sich erinert an ti kroos Papiloon un hot tëm wayn kep fon sayne khelich — te wayn fon sayn furioos wuut. 20Ale insle sin uner kang un ale përiche sin ferxwun. 21Xloose reen is fom himel kefal iwer ti mënxe. Waare kroose xteen, woo mee wii traysich khilo kewoo hon. Un ti mënxe hon Hërkot ferfluucht weche te plaake fom xloose xteen, wayl ti xreklich waar.
