Apokalipse 15
Ti ëngle un ti letste plaake
1Tëm noo, hon ich en anere misteroose sinal am himel kesiin, kroos un erxtaunich. Waare siwe ëngle mit siwe plaake, woo ti letste sin, wayl ti sin te ën fon Hërkot sayn wuut.
2Tan hon ich kesiin was aus kesiin hot wii en klaas meer fermixt mit fayer. Hon aach ti layt kesiin woo te monster un sayn imaaje ap kewun hon, te monster welche naame representeyert is mit en numer. Tii hon uf kextan, ticht am klaas meer, un hon ti harpe kexpiilt woo Hërkot tëne kep hat. 3Hon tas Kesang fon Mooses, Hërkot sayne tiiner, kesung, un tas Kesang fom Xoof. Hon soo kesung:
“Oh Hër Kot, Almechtiche, wii kroos un wunerlich sin tayn aarwate!
Kheenich fon te natsioone, wii kerechtich un fol woerheet sin tayn pleen!
4Weyer wërt tich net rexpekteere, Hër?
Weyer wërt net wole tayn kloor aan saan?
Wayl ploos tuu pist haylich.
Ale natsioone wëre khome un wëre tich atoreere,
wayl tayn kerechtiche aarwate kewe fon al kesiin.”
5Klaych tëm noo, hon ich kesiin tas im himel te thëmpel sich uf kemach hot, tas mënt, ti Hit fon Hërkots Presëns. 6Ti siwe ëngle woo ti siwe plaake hate sin aus em Hayliche Plats raus kang. Ti waare keklayt mit ways un klënsich layn tsaych un hate koltne pënt um ti prust. 7Tan hot ëne fon te fier leewente kriature siwe koltne kheliche ap kep fer ti siwe ëngle. Ti kheliche waare fol mit ti wuut fon Hërkot, tee woo fer aler eewichkheet leewe tuut. 8Te thëmpel is fol fom tamp fon Hërkot sayn kloor un macht kep, un nimant khont rin keen pis ti siwe plaake woo ti siwe ëngle keprung hon ans ën kheemte.
2022 Sociedade Bíblica do Brasil
