Tas kesang fon te hunert fier un fërtsich tausent
1Tëm noo hon ich kekukt un hon te Xoof kesiin xteen uf em përich fon Sioon. Mit tëm waare hunert fier un fërtsich tausent mënxe woo em Xoof sayne naame un te naame fon sayne Fater uf tëne sayn xtërn kexrip hate. 2Tan hon ich en xtim fom himel keheyert, woo sich aan keheyert hot wii en kroos waser fal ore te klank fon en xtarke tuner. Ti xtim woo ich keheyert hon waar wii musik fon harpiste sayn harpe am xpiile. 3Ti hunert fier un fërtsich tausent waare foer em troon, foer te fier leewente kriatuure un foer te fiirer en nay kesang am singe, woo noore tii lërne khonte. Fon te kans mënxheet waare tii ti eensichste woo kekhaaft kep waare fon Hërkot. 4Waare tii woo sich sauwer kehal hon wayl se khee relatsioone mit fraae hate. Keen em Xoof noo woo eyer hiin keet. Unich ale mënxe sin tii kekhaaft kep un waare ti eyerxte woo fer Hërkot un fer te Xoof keopfert kep waare. 5Ti hon nii keloo un khee ëne feeler ketuun.
Ti mensaaj fon te tray ëngle
6Tan hon ich en anere ëngel kesiin kans hooch am fliye, mit en eewich mensaaj fom ewankeelium fer aan se saan fer tas folek fon te eyert, fer ale rase, xtame, xprooche un natsioone. 7Eyer saat mit xtarek xtim:
— Rexpekteyert Hërkot un loopt tëm sayn kloor, wayl ti tsayt is xon khom fer Hërkot ti mënxheet se julkeere. Atoreyert tee woo te himel, ti eyert, tas meer un ti waser kwele kemach hot!
8En tswete ëngel is tëm eyerxte noo kefloo, am saan:
— Is kefal! Ti kroos Papiloon is kefal! Ti hot ale foleke pesof kemach, tëne sayne wayn am kewe, te xtarke wayn fon sayn xreklich imoraliteet.
9En trite ëngel is tëm tswete noo kefloo, in xtarek xtim am saan:
— Tii woo te monster atoreere un sayn imaaj un woo te sinal uf ti xtërn kemach kriin ore uf ti hant 10tuun Hërkot sayne wayn trinke, te wayn fon sayn wuut, woo eyer phuer inkexut hot im khelich fon sayn wuut. Ti kewe kekweelt im fayer un im xweefel foer te hayliche ëngle un fom Xoof. 11Te tamp fom fayer woo se kweelt tuut xtaye fer imer. Too kept es khee ruu, net im taach un net nachts, fer tii woo te monster atoreere un tëm sayn imaaj, net fer yeete ëne woo te sinal fon tëm sayne naame hot.
12Tas tswinkt tas em Hërkot sayn folek ti layte aus hale mit ketult. Tas folek is tas woo Hërkot sayn kepoote aan heere un leaal sin fer Yeesus.
13Tan hon ich en xtim fom himel keheyert, woo saat:
— Xrayp tas: kliklich sin ti layt woo fon yets aan foram im klaawe an Hërkot xtërwe!
— Yoo — antwort em Hërkot sayne Kayst — tas is woer! Tii tuun ruue fon sayn xweyer aarwat wayl se te resultaat fon sayn aarwate mit sich nëme.
Ti ërnt fon te ën fon te tsayte
14Tan hon ich kekukt un hon en ways wolek kesiin, un truf hot yemant kesitst woo aus kesiin hot wii en mënx, mit en koltne kroon uf em khop un en xaref sichel in te hant. 15En anere ëngel is aus em thëmpel khom un hot mit xtarek xtim kexraayt fer tee woo uf te wolek kesitst hot:
— Penuts tayn sichel un mach ti ërnt wayl ti tsayt fer se ërnte is xon khom. Ti eyert is fërtich fer ti ërnt!
16Tëm noo hot tee woo uf te wolek kesitst hot ti sichel iwer ti eyert kexwung un hot ti ërnt kemach.
17Tan is en anere ëngel khom aus em thëmpel woo im himel is, un tee ëngel hat aach en xaref sichel.
18Tëm noo is en anere ëngel khom fon ticht fom altar, te ëngel woo tas fayer uf past. Mit en xtarek xtim hot eyer kexraayt fer te ëngel woo ti xaref sichel hat:
— Penuts ti sichel un xnayt ti trauwe klutxe fom trauwe xtok fon te eyert ap, wayl ti trauwe sin rayf!
19Te ëngel hot sayn sichel iwer ti eyert kexwung, hot ti trauwe klutxe fom xtok ap kexnit un hot se in te thanke fon Hërkot sayn furioos wuut keworef, woo ti trauwe fertreet kewe. 20Ti trauwe sin fertreet kep im thanke woo aus te xtat keplipt waar, un te pluut flus woo aus tëm thanke khom is waar tray hunert khilomeeter lang un een un halep meeter tiif.
