Konseele
1Mayn liipe priiter, ich hon fiil ferlange noo aych. Teyer macht mich soo kliklich, un ich sin xtols uf aych! Also, playpt al fest am leewe mit em Hër.
2Ewootia un Siintike, ich pite, tas teyer fersuucht kuut leewe mitnaner, wii kexwister im klaawe. 3Un fer tich, mayne troye khameraate in te aarwat, ferlange ich tas tuu tii tswaay xwestre helfe tuust. Wayl tii, mit Kleement un al ti anere mayn khameraate, hon fiil kexaft fer te ewankeelium ferprayte. Tëne sayne naame xteet im Puch fom Leewe, woo tsu Hërkot keheyert.
4Sayt imer froo, wayl teyer keheyert tsum Hër! Ich saan noch mool: sayt froo!
5Sayt liiplich mit ale layt. Te Hër khomt klaych. 6Khimert aych mit niks, awer in ale kepeet ferlangt fer Hërkot was teyer neetich hat un peet imer mit tankpaarkheet im hërts. 7Un em Hërkot sayne friite, woo nimant ferxteen khan, tuut ayer hërts un ayre sin uf heepe, wayl teyer keheyert em Yeesus Kristus.
8Tsum letste, mayn priiter, filt ayre kayst mit ales was kuut is un loop fertiint, tas is, ales was woer is, aanxtëtich un richtich is, phuer, kefelich un kexayt. 9Praktisiert was teyer fon mich kriit het un kelërnt het, soo fiil mit mayn wërter wii mit mayn akte. Un te Hërkot woo uns te friite wërt pay aych playwe.
Phaulus tankt
10Im Hër sin ich froo kep wayl teyer noch mool ti khimerung ketsaycht hat woo teyer uf mich hot. 11Ich saan tas net wayl ich mich in neetichkheete fiile, wayl ich hon kelërnt tsufriite sin mit was ich hon. 12Ich wees was petayt neetichkheet mit mache un wees aach was petayt mee hon wii neetich. Ich hon kelërnt mich tsuufriite fiile uf ale plats ore yeete situatsioon, wën kuut erneert ore mit hunger, wën ich fiil hon ore weenich. 13Mit te kraft woo Kristus mich kept, khan ich yeete situatsioon foer hoole.
14Toch soo waart teyer froyntlich um mich se helfe in mayn xwiirichkheete. 15Teyer, fon Filipus, wist kans kuut tas, wan ich aus te prowins fon Masetoonia kang sin, in te eyerxte tsayte woo ich te ewankeelium aan kesaat hon, waar ayer khërich ti eensichst woo mich keholef hot. Teyer waart ti eensichste woo teel kenom hon in mayn kewine un ferluste. 16In Tesaloonika, hon ich eftas hilef kepraucht, un teyer het em kexikt. 17Is net tas ich ploos tënke an hilef se kriin. Im keeche teel, ich wil mee kewine siin tepay kexrip an ayer rechnung. 18Hier is mayn kitung fon ales was teyer mich kexikt hot un tas waar mee wii kenuuch. Ich hon ales was ich prauch, ekstra yets woo Epafrotitus mich keprung hot was teyer kexikt hat, was is wii en tsaate parfum fer Hërkot keopfert, woo eyer aan nëmt un woo iim kefalt. 19Un mayne Hërkot, tëm noo ti kloorixe raychtume woo eyer hot fer se kewe torich Yeesus Kristus, wërt aych kewe ales was teyer praycht. 20Fer Hërkot un Fater sol ale kloor kep kewe fer ale eewichkheet! Aamen!
Letste pekriisunge
21Pekriisunge fer Hërkot sayn kans folek woo tsu Yeesus Kristus keheyert. Ti priiter woo hier pay mich sin xike pekriisunge fer aych. 22Tas kanse Hërkots folek fon hier xike pekriisunge, ekstra tii fom Khayser sayne Palas.
Seechnung
23Tas em Hër Yeesus Kristus sayne knaate mit aych sich ferhalt!
