Kolosenser 1

₁Ich, Phaulus, Yeesus Kristus sayne aphostel torich Hërkot sayne wile, xraywe tee priif mit em pruuter Timoteo ₂fer Hërkot sayn folek woo in te xtat Kolosos woont, unser troye priiter in Kristus.

Tas Hërkot, unser Fater, sayne knaate un friite pay aych sich ferhale!

₃Imer wën meyer peete fer aych, tanke meyer Kot te Fater fon unser Hër Yeesus Kristus. ₄Wayl meyer hon se wise kriit fom klaawe woo teyer an Yeesus Kristus het un aach fom liipe woo teyer het fer tas kanse Hërkots folek. ₅Wan ti echt mensaaj, ti kuut naychkheet iwer te ewankeelium, es eyerxte mool pis an aych khom is, het teyer keheyert xpreche iwer ti hofnung woo te ewankeelium aan piite tuut. Tesweche, hot ayre klaawe un liipe sayn pasis an was teyer am waarte sayt un fer aych uf kehoop is im himel. ₆Tii kuut naychkheet woo teyer kriit hot is fiil seechnunge am pringe un is sich am ferprayte iwer ti kans welt. Un kraat tas is paseyert mit aych, tsayt tëm taach woo teyer es eyerxte mool keheyert het se xpreche iwer Hërkot sayne knaate un het ti woerheet kekhënt. ₇Tas ales het teyer kelërnt mit Epafras, unser liipe khameraate, tee woo fer aych xaft als en troye tiiner fon Kristus. ₈Es waar tee woo uns fertseelt hot iwer te liipe woo Hërkots Kayst aych kep hot.

₉Tesweche, tsayt am taach woo meyer tas ales se wise kriit hon, hon meyer nii uf keheyert se peete fer aych. Meyer hon fer Hërkot ferlangt tas eyer aych file sol mit em khëntnis fon tëm sayne wile un mit ale wisheet un ferxtantnis woo em Hërkot sayne Kayst kept. ₁₀Soo, khënt teyer leewe wii te Hër wil hon un imer mache was tëm kefale tuut. Teyer macht ale aarte kuute aktsioone un aach tuut Hërkot imer mee khëne lërne. ₁₁Meyer ferlange fer Hërkot tas teyer xtarek kept mit ale kraft woo fon tëm sayn kloorix macht khomt, tas teyer ales aus hale khënt mit ketult. ₁₂Un tankt, mit frayt, te Fater, woo aych kapasiteet kep hot fer mit hale fon ales was eyer uf kehoop hot im Raych fom Licht fer sayn folek. ₁₃Eyer hot uns pefrayt fon te macht fon te tunkelheet un hot uns in sicherheet keprung pis an te Raych fon sayne peliipte Soon. ₁₄Is tee woo uns pefrayt, un is torich tëm woo unsere sinte fertsayert kewe.

₁₅Eyer, te eyerxte Soon, is ti rewelatsioon woo mer siin khan fom Hërkot woo mer net siin khan; eyer is te iwerxte fon ales was ketsoo kep is. ₁₆Wayl, torich iim, hot Hërkot ales ketsoo, im himel un uf te eyert, soo tas was mer siit soo wii tas woo mer net siit, sokaar ti kaystliche machte, ti kraft, ti rechiirunge un ti autoriteete. Torich iim un fer iim hot Hërkot te kanse Uniwërs ketsoo. ₁₇Foer ales, hot tee xon eksisteyert, un, wayl se mit iim fereenicht sin, playpt aler tings in ortnung un harmonii. ₁₈Tee is te khop fom khërwer, woo ti Khërich is, un is tee woo leewe kept fer te khërwer. Eyer is te eyerxte Soon, woo peleept kep is tas noore tee tas eyerxte plats het in ales. ₁₉Wayl is torich te aychne Hërkots wile woo te Soon ti komplët natuer fon Hërkot in sich hat. ₂₀Soo, torich te Soon, hot Hërkot resolweyert te Uniwërs tsurik fer sich selepst pringe. Eyer hot te friite keprung torich em Soon sayne toot am krayts, un soo hot eyer tsurik fer sich selepst aler tings keprung, soo uf te eyert wii im himel.

₂₁Tefoer, waart teyer wayt fon Hërkot un waart tëm sayn faynte weche em xlecht tings woo teyer kemach un ketënkt hot. ₂₂Awer yets, torich em toot fon sayne Soon am krayts, hot Hërkot kemach tas teyer tëm sayn froynte kep sayt fer iim pis pay aych pringe fer ploos tëm sayn sin, oone khee flek un khee xult se hon. ₂₃Awer, is neetich tas teyer wayter leaal sayt, xtram uf en feste funtamënt, oone wech playwe fon te hofnung woo teyer kriit hot wan teyer ti kuut naychkheet fom ewankeelium keheyert hot. Waar fon tëm ewankeelium woo ich, Phaulus, mich en tiiner kemach hon, un is tee ewankeelium woo aan kesaat am kewe is uf te kans welt.

₂₄Yets fraye ich mich weche was ich mit kemach hon weche aych. Wayl, was ich layte an mayne khërwer weche te Khërich, woo Kristus sayne khërwer is, heleft Kristus sayn layte komplët mache weche te Khërich. ₂₅Un Hërkot hot mich raus kesuucht fer te Khërich sayne tiiner sin un hot mich ti misioon kep woo ich inhale mus mit aych. Tii misioon is aan saan, in en komplët form, tëm sayn mensaaj. ₂₆Tii mensaaj is te kehëmnis woo tee ferxtekelt hot fon te kans mënxheet iwer ti ferkangne yoerhunerte. Awer yets hot eyer se reweleyert fer sayn folek. ₂₇Hërkot sayne plaan is tas sayn folek tee wunerliche un kloorixe kehëmnis khëne sol woo eyer se reweleere hot fer aler foleke. Un te kehëmnis is tee: Kristus is in aych, was aych ti xtram hofnung kept tas teyer teel nëme tuut in Hërkot sayn kloor.

₂₈Soo saan meyer Kristus aan fer aler mënxe. Mit ale meechlich wisheet, peroote un unterichte meyer yeete persoon, fer al hiin pringe pis Hërkot als mënxe kaystlich aus kewakst un fereenicht mit Kristus. ₂₉Is fer tii aarwat se mache woo ich xafe un khëmfe mit Kristus sayn kraft, woo mechtich am wërke is in mich.