1Also, ich wil tas teyer se wise kriit wii fiil ich fer aych kexaft hon, un fer tii woo in Laotisëya woone, un fer fiile anere woo mich net perseenlich khëne. 2Ich xafe tas tëne sayn hërts sich mit koraaj filt un tas se fereenicht im liiwe playwe un soo komplët raych mit te sicherheet woo kep wërt torich ti echt ferxtëntnis fon Hërkot sayne kehëmnis. Tee kehëmnis is Kristus, 3un in tëm sin ale xatse fom khëntnis un fon te wisheet ferxtekelt.
4Ich saan tas aych tas nimant aych hinerkeen khan mit falxe ausleyunge, wën se ach kans kuut foer khome. 5Wayl, wën ich ach im khërwer wayt fort sin, in kayst sin ich pay aych. Un kewe froo wën ich wees tas teyer samer halt un fest sayt im klaawe an Kristus.
Tas leewe in eenichkheet mit Kristus
6Soo, wayl teyer Kristus aankenom het als Hër, leept in iim. 7Playpt aan kewortselt an tëm, paut ayer leewe uf iim un macht aych xtërker im klaawe, wii es aych kelërnt kep waar. Un kept imer Kot say tank.
8Past uf tas nimant aych sklaawe macht torich arkumënte oone weyert, woo fon te mënxlich wisheet khomt. Tas tings khomt fon mënxliche kriatuure sayn unterichte un fon te kayste woo te Uniwërs tomineere un net fon Kristus. 9Wayl in Kristus, als en mënx, is Hërkot sayn kans natuer presënt 10un teyer hot foles leewe kriit in te fereenichung mit Kristus. Tee tomineyert ale machte un kaystliche autoriteete.
11Wayl teyer fereenicht sayt mit Kristus, sayt teyer pexnit kep net mit te pexnaytung woo am khërwer kemach kept, awer mit te pexnaytung woo Kristus macht, woo torich meyer pefrayt kewe fon te macht fon te sintich natuer. 12Wayl, wan teyer ketaaft kep waart, waart teyer peërticht kept mit Kristus; un am taaf waart teyer aach peleept kep mit iim torich em klaawe woo teyer het an Hërkot sayn kroos macht, te selwiche Kot woo Kristus peleept hot. 13Frier waart teyer kaystlich toot weche ayre sinte un wayl teyer khee yute waart. Awer, yets hot Hërkot aych peleept mit Kristus. Hërkot hot unser kanse sinte fertsayert 14un hot ti rechnung fon unser xulte anuleyert, mit te rekulamënte woo mer ketswung waare noo keen. Tee hot ti rechnung tsuu kemach, tii ans krayts am naachle. 15Un es waar am krayts tas Kristus sich pefrayt hot fon te macht fon te rechiirunge un fon te kaystliche autoriteete. Eyer hot tii machte erniitricht in puplikum, un hot se als kefangne kefiert in sayn triunf prosisioon.
16Also, tas nimant fer aych kesetse mache sol iwer was se ese ore trinke, ore iwer fayertaache, un tas Nay Moont Fest, un te samstach. 17Tas ales is noore en xate fon was khomt; ti realiteet is Kristus. 18Lost nimant aych erniitriche, am saan tas eyer peser is wii teyer, wayl er saat tas er wisioone hat un en falx temiitichkheet tsaycht un tas er ëngle atoreyert. Tii mënxe hon khee motiif fer sich mee fine, wayl se am tënke sin kraat soo wii yeete mënx tënkt. 19Tii sin sich net an Kristus am hale, woo te khop is. Kristus kontroleyert te kanse khërwer, tuut em erneere un halt em fereenicht torich ti kliite un ferpintunge, un soo wakst te khërwer wii Hërkot hon wil tas er wakse sol.
Xtërwe un leewe mit Kristus
20Teyer sayt kextorep mit Kristus un tesweche sayt teyer fray fon te xlechte kayste woo te Uniwërs tomineere. 21“Tuu net an tas tings thupe”, “tuu tas aneres net proope”, “tuu tas anere tings net hoole”. 22Ale tii ferpoote hon se tuun mit tings woo unneetich kewe noo sayn penutsung. Sin ploos reechle un unterichte woo ti layt inwenteere. 23In te woerheet, tii reechle siin kluuch aus, wën se tswinge ti ëngle atoreere, ti falx temiitichkheet un en hart aart fer te khërwer se pehantle. Awer tas ales hot khee weyert fer ti pasioone kontroleere woo tsu te imoraliteet hiin fiire.
