1Teyer waart witer peleept kep mit Kristus. Soo, tuut ayre interese ans tings woo fom himel is, woo Kristus uf te rechst sayt fon Hërkot sitst. 2Tënkt ans tings fon uwe in te hee un net an tas woo hier fon te eyert is. 3Wayl teyer sayt xon kextorep, un ayer leewe is ferxtekelt mit Kristus, in Hërkot. 4Kristus is ayer waare leewe, un, wan eyer tsum foerxayn khomt, khomt teyer tsum foerxayn mit iim un hat teel in tëm sayn kloor.
Tas alte leewe un tas naye lewe.
5Tesweche, macht ti weltliche wunxe woo in aych wërke kaput, was mënt, ti seksual imoraliteet, ti unaanxtënichkheet, ti xlechte pasioone, ti xlechte wunxe un ti pekeerung, wayl ti pekeerung is en aart itolatrii. 6Wayl is weche tëm tings tas te Hërkots xtroof truf fale tuut uf tii woo iim net aan heere. 7Frier waar ayer leewe tomineyert fon tëne wunxe, un teyer hat tëm noo keleept.
8Awer yets pefrayt aych fon tëm ales: fom wuut, fon te pasioon un fon te has sentimënte. Un tas fon ayer munt khee een pelaytichung un khee unaanxtënich kexpreech raus khome sol. 9Tuut khee liye aus xpreche, wayl teyer hat xon ayer alt natuer tsurik kelos mit sayn kewoonheete 10un hot aych mit en nay natuer keklayt. Tii natuer is te naye persoon woo Hërkot, ayre Kriator, imer am renoweere is tas se sich ferklayche khan mit iim selepst, tas teyer iim komplët khëne khënt. 11Als resultaat, kep es net mee yute ore tii woo khee yute sin, pexnit ore net, net siwiliseyert, wilte, sklaawe ore fraye mënxe, awer Kristus is ales un is in al.
12Teyer sayt em Hërkot sayn folek. Tee hot aych keliipt un hot aych aus kesuucht fer tsuu tëm keheere. Also, klayt aych mit paarmhërtsichkheet, mit kuutheet, mit humilteet, mit tsaatlichkheet un ketult. 13Tuut aych net ayre eene mit em anere un fertsayert eene te anere, wën yemant etwas se klaache hot keeche en aner persoon. Soo wii te Hër aych fertsayert hot, fertsayert ti anere. 14Un, iwer ales, mist liipe hon, wayl te liipe tuut ales perfektlich fereeniche. 15Un tas te friite woo Kristus kewe tuut aych lënke tuut in ayre pextimunge, wayl waar fer tee friite woo Hërkot aych keruuf hot, fer eene eensichste khërwer formeere. Un sayt tankpaar. 16Tas Kristus sayn mensaaj, mit sayn kans raychtum, leewe tuut in ayer hërts! Lërnt un untericht ëne te anere mit ale wisheet. Singt salme, hiimne un kaystliche liiter; loopt te Hërkot, mit tankpaarkheet im hërts. 17Un ales was teyer macht ore saat, macht tas im Hër Yeesus sayne naame un torich tëm tankt fer Hërkot, te Fater.
Kuut leewe mit te anere
18Fraa, tuu tayne man aan heere, wayl tas is was tuu mache must wayl tuu en krist pist.
19Man, liip tayn fraa un say net krop mit tëm.
20Khiner, ayre kristliche flicht is imer ayre eltre aan heere wayl Hërkot tas kërn hot.
21Eltre, tuut ayre khiner net iriteere, tas tii net ti muut ferleere.
22Sklaawe, tuut in ales aan heere tii woo ayre aychner hier uf te eyert sin. Horicht net ploos wën se aych am siin sin, fer tepay fersuuche tas teyer aproweyert kept. Awer, horicht mit eerlichkheet, weche em klaawe woo teyer an Hërkot hot. 23Was teyer mache tuut, macht tas mit ayer kans hërts, wii wën teyer te Hër am tiine weyert un net ti mënxe. 24Tënkt traan tas te Hër aych als peloonung kept tas was eyer uf kehoop hot fer sayn folek, wayl te echte Hër woo teyer tiint is Kristus. 25Un weyer tas xlechtes tuut, khan sin weyer wil, petsaalt tas xlechtes woo eyer macht. Wayl, wën Hërkot julkeyert, macht eyer khee unerxiit unich te mënxe.
