Kolosenser 4

₁Teyer woo sklaawe hale tuut, sayt kerechtich un eerlich im umkang mit ayre sklaawe. Tënkt tas teyer aach en Hër im himel hat.

₂Playpt fest am kepeet, imer in acht iwer em kepeet un Hërkot am tanke. ₃Peet aach fer uns, tas Hërkot uns en kuut oportuniteet kept fer sayn mensaaj aan saan, woo fon Kristus sayn kehëmnis xprecht. ₄Also, peet tas ich mache khan tas Kristus sayn kehëmnis kuut pekhant kept, wii mayn flicht is.

₅Sayt xlau in ayer aart fer se hantle mit tëne woo net klaawe un penutst kuut ti tsayt. ₆Lost ayre kexpreeche imer froo un lustich sin, tas teyer wist wii antworte fer yeete persoon!

₇Tiikiko, unser liipe pruuter, leaale aarwater un khameraate im Hër sayn aarwat, tuut aych ti naychkheete pringe fon mich. ₈Ich sin tee am xike fer se fertseele wii es uns al keet un soo aych animeere. ₉Mit tëm keet Onësimo, te liipe un leaale pruuter, woo fon ayer khërich is. Tii tuun aych ales fertseele was hier am paseere is.

₁₀Aristarko, woo in te katee is mit mich, xikt aych pekriisunge; un aach Markus, Barnabë sayne feter. Teyer het xon ortnunge iwer Markus, fer iim kuut uf nëme, wën eyer too torich khomt. ₁₁Yooshua, aach Justus kenënt, lost aych pekriise. Tii tray sin ti eensichste yute woo klaawe un pay mich xafe fer te Hërkots Raych un tii hon mich fiil keholef.

₁₂Epafras, anere woo fon ayer khërich is un is tiiner fon Yeesus Kristus, xikt aach pekriisunge. Tee tuut imer xtram peete fer aych. Tee ferlangt fer Hërkot tas teyer imer fest playpt, kaystlich rayf un fërtich fer in hale ales was Kot wil. ₁₃Ich khan fersichere tas tee fiil am xafe is fer aych un fer ti layt fon Laotisëya un fon Hierapolis.

₁₄Lukas, unsere liipe tokter, un te pruuter Teemas xike pekriisunge.

₁₅Meyer xike pekriisunge fer ti priiter woo in Laotisëya woone. Pekriisunge aach fer Ninfa un fer ti khërich woo sich fersamelt in tëm sayn haus. ₁₆Ich ferlange tas, noo teyer tee priif keleest hat, tee fer Laotisëya xikt, tas ti priiter fon tort tee aach leese khëne. Un teyer leest te priif woo fon Laotisëya khomt. ₁₇Un saat tas fer Arkipo: fersuuch kuut in hale te ufkaape woos tuu kriist host im tiinst fer Hërkot.

₁₈Mit mayn aychne hant xraywe ich tas: Pekriisunge fon Phaulus. Ferkest net tas ich in te katee sin.

Tas Hërkots knaate mit aych sich ferhalt!