1Tesalooniker 1

₁Ich, Phaulus, un Silas, un Timoteo xraywe tee priif fer ti priiter fon te khërich in te xtat Tesaloonika, fer aych woo fer Hërkot, te Fater, keheyert un mit em Hër Yeesus Kristus.

Tas te knaate un te friite pay aych sich ferhale!

₂In unser kepeete tuun meyer imer Kot say tank kewe weche aych al, un pite imer um aych. ₃Wayl meyer tënke imer, foer unser Hërkot un Fater, wii teyer ayre klaawe praktisiert hot, wii ayre liipe aych soo fiil xafe kemach hot un wii xtram ti hofnung is woo teyer an unser Hër Yeesus Kristus hot. ₄Priiter, meyer wise tas Hërkot aych liipe tuut un hot aych aus kesuucht fer tsu iim keheere. ₅Wayl meyer hon te ewankeelium fer aych aan kesaat net ploos mit wërter, awer aach mit macht, mit em Hayliche Kayst un mit te sicherheet tas ti mensaaj ti woerheet is. Teyer wist wii meyer uns unich aych ferhal hon, fer aych ti retung se pringe. ₆Un teyer sayt unser payxpiil noo kang un aach em Hër Yeesus sayne payxpiil.

Wën teyer ach fiil layte mit kemach hot, hot teyer ti mensaaj uf kenom mit te frayt woo fom Hayliche Kayst khomt. ₇Soo sayt teyer payxpiil kep fer ti kriste fon te prowinse fon Masetoonia un Akaya. ₈Wayl ti mensaaj iwer te Hër is fon aych ap kexikt kep un hot sich ferxtraut iwer Masetoonia un Akaya, un ti naychkheete iwer ayre klaawe an Hërkot sin pis an ale plets aan khom. Also, iwer tas prauch sonst niks mee kexproch kewe. ₉Ale layt fon tëne plets xpreche iwer unser pesuuch fer aych un fertseele wii teyer uns kuut uf kenom hot un wii teyer net mee ti iitole noo keet fer te leewente un echte Hërkot tiine. ₁₀Ti fertseele aach wii teyer am waarte sayt tas Yeesus, Hërkot sayne Soon, tee woo Hërkot peleept hot, noch mool fom himel khome sol, tee Yeesus woo uns rete tuut fom himlixe xtroof woo noch khome sol.