1Tesalooniker 2

₁Teyer wist kans kuut, priiter, tas unser pesuuch net oone penutsung keplip is. ₂Wist aach wii meyer xlecht pehantelt kep sin in te xtat Filipus, eep meyer too in Tesaloonika aan khom sin. Meyer sin fiil pekhëmft kep, awer unser Hërkot hot uns koraaj kep fer aych ti kuut naychkheet aan saan woo fon iim khomt. ₃Tas was meyer aych aan kesaat hon hot net sayn basis an feeler ore xlechte intensioone; un hon aach nimant fersuucht se hinerkeen. ₄Im keeche teel, meyer hon imer kexproch wii Hërkot hon wil tas meyer xpreche sole, wayl eyer hot uns aproweyert un hot uns te ufkaape kep fer te ewankeelium aan saan. Meyer wole net ti mënxe kefale, awer Herkot, woo unser intensioone in proop xtelt.

₅Wayl teyer weest kans kuut tas meyer khee xeene wërter penutst hon fer aych se hinerkeen, un hon net fersuucht aych pexpreche fer kelt se kriin. Hërkot is tsayer tefon. ₆Meyer hon nii loop kesuucht fon nimant, net fon aych un net fon anere. ₇Awer, meyer hate ti recht fer etwas fon aych ferlange, wayl meyer aphostel fon Kristus sin. Awer, wan meyer pay aych waare, sin meyer kang als khiner, sin kang als en moter woo sayn khiner uf pase tuut. ₈Meyer hon aych soo fiil keliipt, tas meyer hete kërn net ploos ti kuut naychkheet woo fon Hërkot khomt aych kep, awer aach sokaar unser aychne leewe. Wii fiil hon meyer aych keliipt! ₉Priiter, kans sicher erinert teyer aych wii meyer kexaft un kekhëmft hon fer unser leepens unerhalung fertiine. Meyer hon taache un nacht kexaft tas meyer khee last weere fer aych, soo lang wii meyer ti kuut naychkheet woo fon Hërkot khomt fer aych aan kesaat hon.

₁₀Teyer sayt unser tsayer un Hërkot aach tas unser unerhalung unich aych woo keklaapt hon sauwer, khorekt un oone feeler waar. ₁₁Teyer wist tas meyer yeete ëne pehantelt hon wii en fater fer sayn khiner. ₁₂Meyer hon aych uf kemuut un kemaant fer se leewe soo wii es Hërkot kefalt. Hërkot ruuft aych fer teel se nëme in sayne Raych un in sayn kloor.

₁₃Un is en anere motiif warom meyer imer Kot say tank kewe. Wan meyer Hërkot sayn mensaaj aych hiin keprung hon, het teyer se aan keheyert un aan kenom, net als mënxe wort awer als Hërkots mensaaj, was es wërklich is. Wayl Hërkot is am xafe an aych, tii woo klaawe. ₁₄Mayn priiter, was mit aych paseyert is waar aach xon paseyert kewees mit Hërkot sayn khëriche in Yutëya, mit tëm folek woo tsu Yeesus Kristus keheyert. ₁₅Waare ti yute woo te Hër Yeesus un ti profëte umkeprung hon un hon uns aach keyacht. Tii hon Hërkot net kefal un sin faynte fon ale layt. ₁₆Fersuuche sokaar pehinre tas meyer ti retung mensaaj aan saan fer tii woo khee yute sin. Too temit file se ti moos fon sayn sinte komplët. Awer, yets is Hërkot sayne xtroof ëntlich mool iwer se kefal.

₁₇Priiter, meyer muste uns aptrëne fon aych iwer en tsayt. Meyer sin wayt fon te aue, awer tich am hërts. Meyer hon fiil ferlange fon aych un teere aych kërn noch mool siin. ₁₈Tesweche wolte meyer pis pay aych en pesuuch mache. Weenichstens ich, Phaulus, wolt tas mee mool mache, awer Satanaas hot tas net kelos. ₁₉Wën unser Hër Yeesus khome tuut, sayt teyer un nimant sonst, in en kans spesiaal aart, unser hofnung, unser frayt un motiif fer tsufriite sin foer iim, weche unser kewinung. ₂₀Teyer sayt toch unser eere un unser frayt!