1Tesalooniker 3

₁Tan khonte meyer net mee aus hale oone se wise iwer aych. Tesweche, hon Silas un ich resolweyert aleen in Atenas playwe ₂un unser pruuter Timooteo pis an aych xike. Tee xaft mit uns im Hërkots aarwat, Kristus sayne ewankeelium am aan saan. Meyer hon em kexikt fer aych animeere un aych helfe im klaawe, ₃tas nimant oone muut playpt weche te yacht. Teyer selwer wist kans kuut tas tii teel nëme fon Hërkots wile fer uns. ₄Wayl, wan meyer pay aych waare, hon meyer aych awiseyert tas meyer keyacht kewe teere; un, wii teyer wist, tas is wërklich paseyert. ₅Tesweche khont ich net mee aus hale oone naychkheete iwer aych, un hon Timoteo kexikt fer se wise kriin wii es keet mit em klaawe woo teyer hot. Ich hat pang tas te Taywel aych fersuuchunge foer kextelt het soo tas unser kans aarwat unnutslich kep weyer.

₆Yets is Timoteo xon tsurik khom fon Tesaloonika un hot uns kuute orter keprung iwer ayre klaawe an Hërkot un fom liipe woo teyer het ëne tsu te anere. Eyer hot uns fertseelt tas teyer imer an uns tënke tuut mit tsaatlichkheet un hot luste fer uns noch mool siin soo wii meyer aych siin wole. ₇Soo, priiter, in ale unser xwiirichkheete un layte, was uns animeyert hot is te klaawe woo teyer hot. ₈Yets fiile meyer uns mit mee leewe wayl meyer wise tas teyer wayter xtram im klaawe leewe tuut fereenicht mit em Hër. ₉Un soo khëne meyer Kot say tanke kewe weche aych. Meyer tanke ti frayt woo meyer foer unser Hërkot hon weche aych. ₁₀Taache un nacht ferlange meyer fer Hërkot mit unser kans hërts tas eyer uns lose sol aych perseenlich pesuuche khome tas mer aych helfe khëne an was noch feelt am klaawe woo teyer hot.

₁₁Tas te aychne Hërkot, unser Fater, un unser Hër Yeesus te weech prepareere tas meyer aych pesuuche khome khëne! ₁₂Tas te Hër macht tas yeetes mool mee wakse tuut te liipe woo teyer ëne tsu te anere hot un fer ale layt, un tas tee liipe ekaal kept mit em liipe woo meyer fer aych hon! ₁₃Soo kept Hërkot kraft fer ayer hërts, un teyer wërt komplët tetikeyert uf iim un wërt oone xult sin foer unser Hërkot un Fater, wan unser Hër Yeesus khome tuut mit al tii woo iim keheere. Aamen!