Tas leewe woo Hërkot kefalt
1Tsum letste, priiter, teyer hot yoo kelërnt fon uns wii teyer leewe solt fer Hërkot kefale; un is kraat soo woo teyer keleept hot. Un yets ferlange meyer un tuun aych aan roote, im Hër Yeesus sayne naame, tas teyer noch mee mache solt. 2Wayl teyer khënt was meyer aych in te untericht kelërnt hate torich em Hër Yeesus sayn autoriteet. 3Was Hërkot fon aych wil is tas: tas teyer kans hiin kep sayt fer iim un aych pefraye tuut fon te imoraliteet. 4Tas yeete ëne mit sayn fraa leewe wees in en aart woo Hërkot kefale tuut, mit ale rexpekt 5un net mit nitere seksuaale layte, wii ti unklaupliche es mache, woo Hërkot net khëne. 6In tëm phunkt, tas nimant sayne pruuter xaate macht, un tëm sayn rechte mise rexpekteyert kewe! Wayl, wii meyer xon kesaat hon un kemaant hon, te Hër tuut hart xtroofe tii woo tas tings mache. 7Hërkot hot uns net keruuf fer in te imoraliteet se leewe, awer kans hiin kep fer iim. 8Soo, weyer tii untericht ap saat is net en mënx am ap saan, awer Hërkot, woo aych sayne Hayliche Kayst kept.
9Is net neetich aych se xraywe iwich te liipe fer ti priiter im klaawe, wayl te aychne Hërkot hot aych kelërnt tas teyer ëne te anere liipe mist. 10Wayl is tee liipe woo teyer ketsaycht het fer ale priiter woo in te kans prowins Masetoonia leewe. Also, mayn priiter, meyer ferlange tas teyer aach noch mee mache tuut: 11fersuucht in friite se leewe, khimert aych mit ayre aychne kexefte un leept fon ayre aychne aarwat, wii meyer xon tefoer kesaat hon. 12Soo, tuun tii woo khee kriste sin aych rexpekteere, un teyer praycht net fon te anere ap hënge.
Te aankhom fom Hër Yeesus Kristus
13Priiter, meyer wole tas teyer ti woerheet se wise kriit iwich tii woo xon kextorep sin, tas teyer net traurich kept soo wii tii woo khee hofnung hon. 14Meyer klaawe tas Yeesus kextorep is un noch mool peleept is; un soo klaawe meyer aach tas, torich Yeesus, Hërkot mit iim pringe wërt tii woo kextorep sin.
15Tëm noo em Hër sayn unterichte, fersichere meyer aych tas: meyer, tii woo leewent sin am taach woo te Hër khome tuut, keen net foer tëne woo xon kextorep sin. 16Wayl es kept en komant, um ti xtim fom ertsëngel, un te klank fon Hërkot sayn trompet, um tan tuut te aychne Hër fom himel runer khome. Tii woo kextorep sin an Kristus am klaawe tuun te eyerxt peleepe. 17Tan kewe meyer, woo leewent sin, uf te wolke kenom, mit tëne, fer uns pekeechne mit em Hër in te luft. Un soo playwe meyer fer imer mit em Hër. 18Also, animeyert ëne ti anere mit tëne wërter.
