Fërtich fer em Hër sayne aankhom
1Priiter, teyer praycht net hon tas ich aych xraywe iwich wan un wii tas tings paseere sol. 2Also, teyer wist kans kuut tas te Taach fom Hër khome tuut wii en xpits puup in te xtil nacht. 3Wën ti layt aanfange se saan: “Ales is ruich un sicher” tan is es tas, pletslich, ti fernichtung uf tii fale tuut. Ti layt khëne net ausrayse, wayl tas wil khome wii en fraa woo ti phayn fom kepoer am xpiire is.
4Awer teyer, priiter, sayt net in te tunkelheet, un em Hër sayne Taach tëref aych net fange wii en xpits puup, woo uf mool iwerumpelt. 5Teyer al sayt fom licht un fom taach. Meyer sin net font te nacht un fon te tunkelheet. 6Tesweche playwe meyer net am xloofe, wii ti anere, awer playwe wach un in perfekte ferxtant. 7Tii woo xloofe, xloofe nachts, un tii woo trinke is ooments woo se pesof kewe. 8Awer meyer, woo fom taach sin, mise in unsere perfekte ferxtant sin. Meyer mise te klaawe un te liipe als panser penutse un unser retungs hofnung als helm. 9Hërkot hot uns net aus kesuucht fer tëm sayne wuuts xtroof mit mache, awer fer uns ti retung kewe torich unser Hër Yeesus Kristus, 10woo kextorep is weche uns tas mer khënte mit tëm leewe, kraat soo fiil wën mer leewent sin soo wii wën mer toot sin wën eyer khome tuut. 11Also, animeyert un heleft ëne em anere, wii teyer es kemach het pis yets.
Letste konseele un pekriisunge
12Priiter, meyer ferlange aych tas teyer rexpekteere tuut tii woo unich aych xafe, tas mënt, tii woo te Hër aus kesuucht hot fer aych se fiire un aych unterichte. 13Pehantelt tii layt mit kroose rexpekt un liipe, weche tëne iire aarwat. Un leept in friite ëne mit te anere.
14Meyer ferlange aych, priiter, tas teyer ti faulënser mit xtramheet aan ruufe tuut, koraaj kept fer ti xichter, ti xwache im klaawe helfe tuut un ketult mit se al. 15Past uf tas nimant tas xlechtes mit xlechtes petsaale tuut. Im keeche teel, fersuucht in ale keleechenheete tas kuutes tuun ëne fer te anere un aach fer tii woo khee priiter im klaawe sin.
16Sayt imer froo, 17tuut imer peete 18un sayt imer tankpaar fer Hërkot in ale oportuniteete. Tas is es was Hërkot fon aych hon wil wayl teyer fereenicht sayt mit Yeesus Kristus.
19Tuu net em Hayliche Kayst sayn aktsioon xteere. 20Tuut net ti profesiis neewe lose. 21Tuut ales unersuuche un pehalt noore was kuut is 22un lost neewe ales was xlecht is.
23Tas Hërkot, woo uns te friite kept, mache tuut tas teyer komplët tetikeyert sayt tsu iim. Un tas eyer ayre kayst, ayer seel un ayre khërwer fray hale sol fon ale fleke, fer te taach woo unser Hër Yeesus Kristus khome sol. 24Tee woo aych ruuft is leaal un macht tas.
25Priiter, tënkt an uns in ayre kepeete.
26Pekriist ale kriste mit en priiterliche khus.
27Ich tuun tringlich ferlange, torich em Hër sayn autoriteet, tas tee priif keleest kept fer ale priiter.
Seechnung
28Tas te knaate fon unser Hër Yeesus Kristus mit aych sich ferhalt!