2Tesalooniker 1

₁Ich, Phaulus, un Silas un Timoteus xraywe tee priif fer ti priiter fon te khërich fon te xtat Tesaloonika, woo fer Hërkot, te Fater, keheyert mit em Hër Yeesus Kristus.

₂Tas te knaate un friite fon Kot, unser Fater, un fom Hër Yeesus Kristus mit aych sich ferhalt.

₃Priiter, meyer mise imer Hërkot tanke weche aych. Fer uns is es richtich tas mache wayl te klaawe woo teyer hat is imer mee am wakse un te liipe woo teyer hat ëne tsum anere is imer kreeser am kewe. ₄Is tesweche tas meyer in Hërkot sayn khëriche xtols iwich aych xpreche. Meyer sin xtols uf aych weche te ketult un klaawe woo teyer tsayche tuut im mite fon ale yacht un layte. ₅Tas is en pewaysung tas Hërkot en kerechtiche julkamënt halt.

Als resultaat, tuut teyer tëm sayne Raych fertiine, weche was teyer am layte sayt. ₆Hërkot wërt mache was kerechtich is: tee pringt layte fer tii woo mache tas teyer layte tuut ₇un wërt ruu fer aych kewe un aach fer uns, woo layte tuun. Tee macht tas wan te Hër Yeesus fom himel khome wërt un tsum foerxayn khomt mit sayn mechtiche ëngle, ₈tswixe fayer flame, fer se xtroofe tii woo Hërkot ap xtoose un net unser Hër Yeesus sayne ewankeelium noo keen. ₉Tii wëre kextrooft mit te eewich fernichtung un playwe wayt wech fom Hër sayn presëns un fon sayn klorioos macht. ₁₀Tas wërt paseere an tëm taach, te taach woo eyer khome wërt fer keloopt kewe fon sayn kans folek un fer homenaajes kriin fon al tii woo klaawe. Teyer wërt aach unich tëne sin, wayl hat keklaapt an ti mensaaj woo meyer aan kesaat hon.

₁₁Is tesweche woo meyer imer fer aych peete. Meyer ferlange fer Hërkot, tee woo aych keruuf hot fer es naye leewe, tas tee mache sol tas teyer tas weyert sayt. Meyer ferlange aach tas eyer, torich sayn macht, al ayer wunxe fol file tuut fer tas kuutes se tuun un ayer aarwat woo teyer mit klaawe am mache sayt komplët mache sol. ₁₂Soo Yeesus, unser Hër, wërt keloopt weche ayre ferhale, un teyer kept keloopt fon tëm, torich unser Hërkot sayne knaate un fom Hër Yeesus Kristus.