2Tesalooniker 2

₁Yets, priiter, iwich te aankhom fon Yeesus Kristus, unser Hër, un fon unser trefung mit iim, ferlange meyer aych awer: ₂Tuut aych net laycht xteere lose un tuut net ferxreke wën yemant fersichere tuut tas em Hër sayne Taach xon khom is. Filaycht saat yemant tas meyer tas fersichert hate wan mer am profetiseere waare ore te ewankeelium am aan saan waare ore tas mer tas kexrip hon in etliche priif. ₃Lost nimant aych hinerkeen mit niks fon soo en tings. Wayl, foer tëm taach, mus ti Rewolte keeche Hërkot paseere, un te Xlechte Man, woo konteneyert kept fer in ti hel khome mus tsum foerxayn khome. ₄Tee wërt keeche ales was ti layt atoreere sin un keeche ales was se mëne weyer fon Kot. Eyer wërt sich iwer al xtele un sokaar wërt rin keen un sich setse in Hërkot sayne Thëmpel un fersichere tas eyer Kot is.

₅Erinert teyer aych net filaycht tas ich aych tas kesaat hon wan ich pay aych waar? ₆Un teyer weest aach tas etwas eksisteyert woo net lost tas tas yets paseere tuut; awer, in te richtich tsayt, khomt te Xlechte Man tsum foerxayn. ₇Ti Misterioos Xlechtichkheet is xon am xafe, awer was tsum paseere is, tuut noore paseere wan tee woo tas net paseere lost neewe kelos kept. ₈Tan khomt te Perwërse tsum foerxayn, un te Hër Yeesus, wan eyer khome tuut, tuut em toot mache mit en hauch ploos un tuut em fernichte mit sayn klorioos presëns. ₉Te Xlechte Man wërt aan khome mit te macht fon Satanaas un wërt ale sorte falxe wunere mache un ti mënxe ferplënte temit. ₁₀Tee tuut hinerkeen mit ale sorte xlechtichkheete tii woo fernicht kewe. Ti kewe fernicht wayl se net ti woerheet woo se rete khënt aan kenom hon un net keliipt hon. ₁₁Tesweche xikt Hërkot ti macht fom feeler fer in tëne xafe tas se klaawe an was falx is. ₁₂Te resultaat fon tas ales is tas konteneyert wëre al tii woo net an ti woerheet klaawe, awer hon frayt in te sinte.

₁₃Priiter, meyer mise imer Hërkot tanke weche aych, weyer Hërkot liipt. Wayl Hërkot hot aych aus kesuucht als ti eyerxte woo keret kewe torich ti macht fom Hayliche Kayst un torich em klaawe woo teyer hat an ti woerheet, fer en folek se sin woo fer Hërkot tetikeyert is. ₁₄Waar fer tas woo Hërkot aych keruuf hot torich te ewankeelium woo meyer aan kesaat hon, tas teyer teel nëme tuut in te kloor fon unser Hër Yeesus Kristus. ₁₅Also, priiter, playpt xtram un tuut ti woerheete uf heepe woo meyer aych kelërnt hon soo in unser mensaajes wii in unser priif.

₁₆Tas unser Hër Yeesus Kristus, un Hërkot, unser Fater, woo uns liipt un woo in sayn kuutheet uns en koraaj kept woo khee ën hot un en xtram hofnung, ₁₇ayer hërts filt mit muut un macht se xtarek fer se mache un saan ales was kuut is!