Peet fer uns
1Tsum xlus, priiter, peet fer uns tas em Hër sayn mensaaj sich xnel wayter ferprayte tuut un kuut aan kenom kept, wii es mit aych paseyert is. 2Peet aach tas Hërkot uns pefraye tuut fon te xlechte un perwërse layt, wayl net al klaawe an te mensaaj.
3Awer, te Hër Yeesus is leaal. Tee kept aych kraft un pefrayt aych fom Taywel. 4Un meyer sin sicher im Hër tas teyer am mache sayt was mer aych foer kesaat hon un tuut tas wayter mache.
5Tas te Hër aych peser ferxteen macht em Hërkot sayne liipe uf aych un ti kraft woo eyer, Kristus, kept.
Xafe un kuutes tuun
6Priiter, im naame fon unser Hër Yeesus Kristus, ortne meyer fer aych tas teyer wech playpt fon ale priiter woo leewe oone xafe un woo net ti unterichte noo keen woo meyer tëne kep hon. 7Teyer wist kans kuut tas teyer unser payxpíil noo keen mist, wayl meyer hon net unich aych keleept oone xafe. 8Hon niks aan kenom fon nimant oone se petsaale; in te woerheet, meyer hon kexaft un uns miit kemach oone uf kewe, taache un nacht, fer khee kewicht sin fer nimant fon aych. 9Is klaar tas meyer recht hon fer ti neerung se kriin; awer hon niks ferlangt, tas teyer unser payxpiil noo këngt. 10Wayl, wan meyer too waare, hon tii reechel kep: “Weyer net xafe wil, sol net ese.”
11Meyer sin tas am saan wayl meyer keheyert hon tas unich aych phaar layt sin woo leewe wii ti faulënser: mache niks un tuun sich in te anere sayn leewe rin mixe. 12Im naame fon unser Hër Yeesus Kristus, tuun meyer tringlich ortne fer tii layt tas se richtich leewe sole un xafe sole fer sich se hale. 13Awer teyer, priiter, kept net miit fom kuutes se mache.
14Wën yemant net aan heere wil was meyer am xike sin in tëm priif, tuut kuut opserweere weyer tas am mache is un playpt wech fon tëm, tas er sich xeeme tuut. 15Awer, tuut em net pehantle als faynt, awer tuut em aan ruufe wii mer en pruuter aan ruufe tuut.
Pekriisunge
16Tas te Hër fon te friite aych te friite kept, imer un in ale aarte! Un tas te Hër mit aych sich ferhalt!
17Mit mayn aychne hant xraywe ich tas: Pekriisung fon Phaulus. Is soo woo ich al mayn priife unertsaychne; is soo tas ich xraywe.
Seechnung
18Tas te knaate fon unser Hër Yeesus Kristus mit aych sich ferhalt!
