1Timoteus 1

₁Ich, Phaulus, Yeesus Kristus sayne aphostel torich ti ortnung fon Hërkot, unser Reter, un fon Yeesus Kristus, unser hofnung, ₂xraywe ich fer tich, Timoteus, mayne waare soon im klaawe.

Tas te knaate, ti paarmhërtsichkheet un te friite fon Hërkot, te Fater, un Yeesus Kristus, unser Hër, pay tich sich ferhale!

₃Ich ferlange tich tas tuu wayter in te xtat Ëfesus playpst, wii ich xon ferlangt hat wan ich noo te prowins Masetoonia am keen waar. Es kept too in tee xtat phaar woo falxe unterichte am kewe sin, un tuu must mache tas se noo lose mit tëm tings. ₄Saa fer ti mënxe tas see ti faaple neewe lose un ti lange liste fon foerkhomer, wayl tas tings pringt ploos tiskusioone. Tii hon niks se tuun mit Hërkot sayne plaan, woo pekhant is noore torich em klaawe. ₅Tii ortnung is tas meyer ëne ti anere liipe mit en liipe woo fon en phuer hërts khomt, fon en sauwre kewise un fon en echte klaawe. ₆Phaar hon tas hinerlos un hon sich ferloer in unneetiche tiskusioone. ₇Ti wole Hërkot sayn Kesets mayster sin, awer ferxteen net mool was sii selepst saan, net mool was ti mit soo fiil sicherheet xpreche.

₈Meyer wise tas Hërkot sayn kesets kuut is, wën se penutst kept wii es sin sol. ₉Meyer mise traan tënke, natierlich, tas ti kesetse kemach sin net fer ti khorekte layt, awer fer ti marjinaale un kriminaale, fer ti ateiste un tii woo tas xlechtes aus iipe un fer tii woo Hërkot un ti relichioon net rexpekteere. Sin aach kemach fer tii woo sayn eltre umpringe un ti anere woo yemant umpringe. ₁₀Un fer ti imoraale, ti homoseksuale, ti layt woo anere als sklaawe mache, ti liichner, tii woo falxe tsayer kewe un fer tii woo etwas aneres mache woo keeche ti echt untericht keet. ₁₁Tii untericht is im ewankeelium woo Hërkot mich uf kep hot fer aan se saan, was petayt, in te kuut naychkheet woo fom keseechente un kloorixe Hërkot khomt.

₁₂Ich tanke fer Yeesus Kristus, unser Hër, woo mich kraft kep hot fer mayn misioon in hale. Ich tanke tëm wayl eyer ketënkt hot tas ich leaal sin un wayl eyer mich aus kesuucht hot fer iim se tiine. ₁₃Eyer hot tas kemach wën ich ach in te ferkangne tsayte fluuche keeche iim aus kesaat hon un iim keyacht hon un ferxënt hon. Awer Hërkot waar paarmhërtsich mit mich, wayl ich hat khee klaawe un tesweche wust ich net was ich am mache waar. ₁₄Un unser Hër hot sayn imëns knaate uf mich kexut un hot mich te klaawe un te liipe kep woo mer hon wayl meyer fereenicht sin mit Yeesus Kristus. ₁₅Te echte untericht woo sol keklaapt kewe un aan kenom kewe mit em kanse hërts is tee: Yeesus Kristus is uf ti welt khom fer ti sinter se rete, fon tëne woo ich te xlimste sin. ₁₆Awer, kraat tesweche waar Hërkot paarmhërtsich mit mich, tas Yeesus Kristus sayne ketult mit mich tsayche khënt. Un tas playpt als payxpiil fer al tii woo noch an tëm klaawe wër un tas eewiche leewe kriin. ₁₇Fer te eewiche Kheenich, unxtërwlich un woo mer net siin khan, te eensichste Hërkot — fer tee sole kep kewe ti eere un ti kloor, fer imer! Aamen!

₁₈Timoteus, mayne soon, ich kewe tii ortnung fer tich ap. Tii is im selwiche sin fon te wërter fon te profesii, xon lang tsayt tsurik aus kexproch iwich tich. Tas tii wërter tayn wafe sin tas tuu kuut khëmfe khanst! ₁₉Pehal tayne klaawe un hal tayne kewise sauwer. Phaar mënxe sin sayne aychne kewise net am aan heere un tas is sayne klaawe am fernichte. ₂₀Unich tëne sin Himeneu un Aleksanter, woo ich xon fer Satanaas ap kep hon tas se lërne teere net mee plasfemeere.