1Timoteus 2

₁Eyerxtens, ferlange ich tas kepeete kemach kewe fer ale layt, mit ferlangunge, aan halunge un tank kepeete. ₂Peet fer ti kheeniche un fer ale anere autoriteete, tas mer mit ketult un friite leewe khëne, mit hiin kepung fer Hërkot un rexpekt fer ti anere. ₃Tas is kuut, un Hërkot, unser Reter, hot tas kërn. ₄Tee wil hon tas al keret kewe un ti woerheet khëne lërne.

₅Wayl es kept ploos ëne Hërkot un ploos een person woo Hërkot fereenicht mit te mënxe — te mënx Yeesus Kristus, ₆woo sayn leewe kep hot tas ti layt al fray keepte fon sayn sinte. Tas waar te proop, woo an te richtich tsayt kep waar, tas Hërkot wil hon tas ti layt al keret kewe. ₇Un ich sin aus kesuucht kep als aphostel un mayster fon tëne woo khee yute sin fer ti mensaaj fon klaawe un woerheet aan saan. Ich sin net am liye; ich sin ti woerheet am saan.

₈Ich wil hon tas iweraal ti mëner peete sole, mëner woo sich fer Hërkot hiin kepe; un tas, wën se peete, ti hënt heepe, oone has un oone xtrayt.

₉Ich wiil aach hon tas ti fraae fernineftich sin un aanxtënich un eenfach tsaych aan tuun. Tas se sich xmike, awer net mit komplitsierte hoer khëme, net mit kolt ore phërle xmuk, net mool mit tayre klayter! ₁₀Tas se sich xmike mit kuute aktsioone, wii mache mise ti fraae woo saan weere fer Hërkot tetikeyert!

₁₁Ti fraae sole ruich aan heere fer se lërne un mit kroos humilteet. ₁₂Ich lose net tas fraae unterichte ore autoriteet hon iwer ti mëner; tii mise sich ruich hale. ₁₃Wayl Aatam waar te eyerxt ketsoo kep, un tëm noo Eewa. ₁₄Un es waar net Aatam woo hinerkang kep waar; es waar ti fraa woo hinerkang kep waar un hot Hërkots kesets keproch. ₁₅Awer ti fraa kept keret sayn khiner uf ti welt am pringe, wën sii im klaawe wayter halt, im liipe un sich fer Hërkot tetitkeyert, mit eenfachkheet.