Komplët fereenicht mit Kristus
1Fer xlus mache: mayn priiter, sayt froo wayl teyer fereenicht sayt mit Kristus. 2Ich mache mich niks traus, noch mool saan was ich xon kexrip hat, wayl tas heleft aych in sicherheet hale. 3Wayl tii woo ti richtich pexnaytung kriit hon waare meyer, un net tii. Meyer atoreere Hërkot torich sayne Kayst un fraye uns im leewe woo meyer hon in Kristus Yeesus anxtat unser klaawe an relichioose seremoniis tuun. 4Is woer tas ich aach mayne konfians an tëm tings tuun khënt. Wën yemant tënkt tas eyer too traan klaawe khan, hon ich noch mee motiife fer soo se tënke. 5Ich sin pexnit kep wii ich acht taache alt waar. Ich sin israelite kepoer, fom xtam Benyamin, mit hepreyix pluut. Was se tuun hot mit te kesets, waar ich fariseyer. 6Un ich waar soo fanatix, tas ich ti Khërich keyacht hon. Un was se tuun hot mit Hërkot sayne wile torich ti kesets aan heere, khont nimant mich pexultiche weche niks.
7In te ferkangne tsayt, hat tas tings ales fiil weyert fer mich kehat; awer yets, weche Kristus, mëne ich tas se khee weyert hon. 8Un net noore tas tings, awer ich rechne ales en komplëte ferluste, in ferklaychung mit was wërklich fiil weyert hot, was mënt, Yeesus Kristus, mayne Hër, komplët khëne lërne. Ich hon ales wech kexmis wii wën es lixo weyer, fer Kristus kewine 9un mit tëm fereenicht playwe. Ich fersuuche xon net mee aan kenom kewe fon Hërkot wayl ich ti kesets noo keen. Wayl yets is torich mayne klaawe an Kristus woo ich aan kenom kewe; tii aannëmung khomt fon Hërkot un hot sayn basis am klaawe. 10Ales was ich wil is Kristus khëne lërne un in mich ti macht fon sayn peleepung xpiire. Ich wil aach teel nëme in sayn layte un wii eyer kewe in sayne toot, 11mit te hofnung tas ich peleept kewe fom toot fer tas leewe.
Te kristliche weech
12Ich wil net saan tas ich xon ales hon was ich wil ore tas ich xon perfekt sin, awer tuun wayter laafe fer te prays konkisteere, wayl fer tas hot Yeesus Kristus mich xon konkisteyert. 13Sicher, priiter, tas ich net tënke tas ich tas xon kewun hon. Awer, eens mache ich: ferkese was tsurik playpt un keen foran fer tas woo foer mich is. 14Laafe tirekt tsum opjektiif fer te prays kewine. Tee prays is es naye leewe fer was Hërkot mich keruuf hot torich Yeesus Kristus.
15Meyer al woo kaystlich rayf sin mise soo tënke. Awer, wën yemant fon aych anerxter tënke, wërt Hërkot ales fer aych klaar mache. 16Soo, keen meyer foran, in te selwich richtung woo meyer pis yets kang sin.
17Mayn priiter, tuut mich imer noo mache. Un kukt mit acht aach tii woo leewe tëm noo te payxpiil woo meyer aych kep hon. 18Ich saat tas xon oft mool un yets saan ich es noch mool, am prile: es kept fiil woo, torich ti aart woo se leewe, kewe faynte fon te mensaaj fon Kristus sayne toot am krayts. 19Tii keen fer ti fernichtung in te hel wayl tëne iire kot sin ti wile fom khërwer. Tii hon hoochmuut fon was tëne iire xaam sin solt un tënke ploos ans tings woo fon tee welt is. 20Awer haymat is im himel un sin unruich am waarte uf unser Reter, te Hër Yeesus Kristus, woo fon tort khome tuut. 21Eyer transformeyert unser xwache un xtërwliche khërwer un macht tas tee ekaal kept wii sayne aychne kloorixe khërwer, un fer tas penutst eyer ti selwich macht woo eyer hot fer ales tomineere.
