Kristus sayn humilteet un kroosheet
1Wayl teyer fereenicht sayt mit Kristus, sat teyer xtarek, tëm sayne liipe tuut aych uf muntere, un teyer halt teel am Hërkots Kayst. 2Tan, ferlange ich tas teyer mich ti kroos tsuufriitenheet kept 3Macht niks weche aychne interese ore weche tume winxe fer keloopt se kewe; awer sayt temiitich un rechent ti anere mee wii aych selepst. 4Tas nimant ploos sayn aychne interese suuche sol, awer aach te anere sayn interese.
5Teyer solt unich aych ti selwich aart hon fer se tënke wii Yeesus Kristus hat:
6Eyer hat em Hërkot sayn natuer kehat,
awer hot net fersuucht ekaal wii Hërkot kewe.
7Kraat es keeche teel, hot uf kep fon ales was sayn waar
un hot ti natuer fon en tiiner foer kehool,
soo sich ekaal wii ti mënxe kemach.
Un tas keweenliche leewe fon en mënx am leewe
8waar eyer temiitich un hot Hërkot aan keheyert pis an te toot
— un toot am krayts.
9Tesweche hot Hërkot fer Yeesus ti heechste eere kep
un hot tëm te naame kep woo te importanteste naame is fon ale naame,
10tas, in homenaaj fer Yeesus sayne naame,
ale kriatuure im himel, uf te eyert un in te toote welt, uf ti kniye fale
11un kans klaar aan saan tas Yeesus Kristus te Hër is,
fer Hërkot, te Fater, sayn kloor.
Xayne wii ti xtërne am himel
12Also, mayn liipe froynte, teyer woo mich aan keheyert het imer woo ich pay aych waar, mist mich fiil mee yets aan heere woo ich net pay aych sin. Tuut wayter xafe mit rexpekt un klaawe an Hërkot fer ayer komplët retung. 13Wayl, Hërkot is imer am xafe an aych tas teyer tëm sayne wile aan heere tuut, soo fiil in ketanke wii in akte.
14Macht ales oone klaache un oone tiskusioone 15tas teyer khee feel het ore fleke. Sayt Hërkots khiner, am leewe oone xult unich te xlechte layt, woo net fon Hërkot wise wole. Tswixe tëne mist teyer klënse wii ti xtërne am himel, 16tëne ti mensaaj fom leewe am ap kewe. Wën teyer es soo macht, wëre ich motiif hon fer mich xtols fiile iwer aych am Kristus Taach, wayl tas wërt tsayche tas ale mayn aanxtrëngung un mayn kans aarwat net unneetich waare.
17Filaycht mayn pluut, tas mënt, mayn leewe, wërt presenteyert kep als en opfer mit te opfer woo teyer, torich ayre klaawe, fer Hërkot macht. Wën tas paseere tuut, kewe ich froo un fraye mich mit aych al. 18Kraat soo khënt teyer froo kewe un aych mit mich fraye.
Timoteo un Epafrotitus sayn pleen
19Wën tas em Hër Yeesus sayne wile is, hofe ich klaych fer aych Timoteo xike tas ich mich uf muute tuun wën ich naychkheete iwer aych se wise kriin. 20Wayl Timoteo is te eensichste woo sich mit aych khimere tuut wii ich, un eyer is te eensichste woo, in te woerheet, sich intereseyert op es aych kuut keet. 21Wayl ti anere al khimere sich mit sayn aychne interese un net mit Yeesus Kristus sayn. 22Un teyer wist kans kuut wii Timoteo sayn weyert pewayst hot. Tee un ich, wii wën meyer fater un soon weere, hon mitsamer kexaft in te aarwat fom ewankeelium. 23Soo, ich hofe tee aych xike soo wii ich se wise kriin wii es mit mich hier playwe tuut. 24Un, am Hër am klaawe, tënke ich tas ich selepst klaych pis aych khome khan.
25Ich mëne aach tas es neetich is unser pruuter Epafrotitus fer aych se xike. Tee is mayne khameraate in aarwat un khëmfe, woo teyer kexikt hat fer mich te hilef pringe woo mich neetich waar. 26Tee hat fiil ferlange noo aych al un is aarich pekhimert wayl teyer se wise kriit het tas tee krank waar. 27In te woerheet, tee waar krank un is neekst kextorep. Awer Hërkot hot em ketauert. Un hot mich aach ketauert; un soo hot eyer mich kexpaart tas ich noch en kreeser traurichkheet het. 28Tesweche xike ich iim tsurik fer aych soo xnel wii meechlich tas teyer ti frayt hon khënt tee noch mool se siin kriin un tas ich net pekhimert playwe. 29Soo, hoolt Epafrotitus ap mit ale frayt, wii mer en pruuter im Hër uf nëmt. Rexpekteyert layt wii tee, 30wayl tee hot sayn leewe riskeyert un is neekst kextorep weche sayn aarwat fer Kristus. Tee hot tas kemach fer mich te hilef kewe woo teyer net perseenlich kewe khont.
