Pekriisung
1Ich, Phaulus, un Timoteo, Kristus sayn tiiner, xraywe tee priif fer ale pewooner fon te xtat Filipus woo tsu em Hërkot sayn folek keheere un klaawe an Yeesus Kristus un aach fer ti pixofe un tiakoone fon te khërich.
2Tas ti knaate un friite fon Hërkot, unser Fater, un fom Hër Yeesus Kristus pay aych sich ferhalt.
Kepeet fon Phaulus fer ti filiper
3Imer woo ich an aych tënke, tanke ich fer mayne Hërkot. 4Un, yeetes mool woo ich fer aych peete, peete ich mit frayt 5weche te aart woo teyer mich keholef het in te aarwat fer te ewankeelium aan saan, tsayt am eyerxte taach pis hayt. 6Wayl, ich sin sicher tas Hërkot, woo ti kuut aarwat aan kefang hot in ayer leewe, tas wayter macht pis tas fërtich kept am Yeesus Kristus sayne Taach. 7Teyer sayt imer in mayn hërts. Un is kerecht tas ich mich soo fiile iwer aych, wayl teyer tuut mit mich hale in tëm priwilëëj woo Hërkot mich kep hot. Is tas woo teyer am mache sayt, wën ich yets in te katee sin un is tas selwiche woo teyer kemach het wii ich fray waar fer te ewankeelium se tefenteere un aan saan mit xtramheet. 8Hërkot is tsayer tas ich ti woerheet am saan sin wën ich fersichere tas mayne kroose liipe fer aych al fom aychne hërts fon Yeesus Kristus khomt.
9Was ich fer Hërkot ferlange is tas ayre liipe yeetes mool meyer wakse sol un wisheet het un en komplëte ferxtantnis, 10tas teyer wist tas peste aus suuche. Soo, am taach woo Yeesus khome tuut, sayt teyer xon pefrayt fon was net sauwer is un fon aler xult. 11Ayer leewe is fol mit kuute kwaliteete woo ploos Yeesus Kristus protutseere khan, fer ti kloor un loop fer Hërkot.
Tas leewe is Kristus
12Mayn priiter, ich wil tas teyer se wise kriit tas es tings woo mit mich paseyert is keholef hot, in te woerheet, te foerkang fom ewankeelium. 13Soo waar es tas ale soltaate fom Kowerneyer sayne palas un ale anere persoone fon too se wise kriit hon tas ich in te katee sin wayl ich Kristus sayne tiiner sin. 14Un ti meyerxte fon te priiter, am siin tas ich in te katee sin, tuun mee am Hër klaawe. Soo hon se imer mee koraaj fer em Hërkot sayn mensaaj aan saan. 15Is woer tas phaar fon tëne Kristus aan saan wayl se naytich un kërn tsënke tuun; awer anere tuun em aan saan mit kuute wile. 16Tii mache tas weche em liipe tsu mich, wayl se wise tas Hërkot mich ti aarwat kep hot fer te ewankeelium se tefenteere. 17Ti anere tuun net Kristus aan saan mit eerlichkheet, awer weche perseenliche interese. Tii tënke tas se soo mayn layte ferkreesere soo lang wii ich in te katee sin.
18Awer tas macht niks. Was important is, is tas Kristus am aan kesaat kewe is, wën tas weche xlechte ore kuute motiife is. Tesweche sin ich froo un soo playwe ich wayter. 19Wayl, ich wees tas, torich ayre kepeete un mit em hilef fom Yeesus Kristus sayne Kayst, kewe ich pefrayt. 20Mayne kroose wunx un mayn hofnung is fer nii feeler mache in mayn flichte, tas imer un yets noch mee, ich fiil koraaj hon. Un soo, in ales was ich saan un mache, soo im leewe wii im toot, khan ich ti anere fiire fer Kristus sayn kroosheet erkhëne. 21Wayl fer mich, leewe is Kristus, un xtërwe is noch peser. 22Awer, wën ich wayter leewe, khan ich noch en neetich aarwat mache. Tan, wees ich net was aus suuche. 23Es tsiit mich uf tswaay sayte, wayl ich tuun fiil hofe tas leewe hiner lose un pay Kristus sin, was fiil peser is. 24Awer, weche aych, is kans neetich tas ich wayter leewe playwe. 25Un, wii ich sicher too triwer sin, wees ich tas ich wayter leewe un tas ich pay aych al playwe fer se helfe foran xrite mache un froo se sin im klaawe. 26Soo, wan ich aych noch mool pesuuche khome, wërt teyer mee motiife hon fer xtols iwich mich se sin, in Yeesus Kristus.
Xtramheet un koraaj
27Yets, tas importanteste is tas teyer leewe tuut tëm noo Kristus sayne ewankeelium. Soo, wën ich aych pesuuche ore net, wees ich tas teyer wayter xtram un fereenicht playpt. Un wërt aach wise tas teyer, torich em klaawe woo uf em ewankeelium sayn basis hot, sayt mitsamer am khëmfe, mit en eensichste wunx. 28Khee pang hon fon ayre faynte. Sayt imer korajoosich, wayl tas is en pewaysung tas tii ferleere tuun un tas teyer kewine tuut. Wayl is Hërkot weyer tas kewine aych kewe tuut. 29Wayl eyer aych te priwilëëj fer Kristus tiine kewe tuut, net ploos an tëm am klaawe, awer aach weche iim am layte. 30Yets khënt teyer teel hale im khamf mit mich. Wii teyer wist, te khamf woo teyer kesiin hot tas ich in te ferkangne tsayt hat is ti selwich woo noch wayter halt.