Efësius 6

₁Khiner, ayre kristliche flichte is ayre fater un moter aan heere, wayl tas richtich is. ₂Wii ti Hayliche Xrifte saan: “Rexpekteyer tayne para un tayn mama.” Un tee is te eyerxte kepoote woo en ferxprechung mit pringt, woo is: ₃“Mach soo tas ales kuut ap laafe tuut fer tich, un tuu lang leewe tuust uf te eyert.”

₄Eltre, pehantelt net ayre khiner soo tas se pees kewe. Im keeche teel, teyer mist se tsiye mit tisipliin un ti kristliche unterichte.

₅Sklaawe, tuut ayre aychner aan heere mit pang un rexpekt fer tii woo ayre aychner sin hier uf te eyert. Un macht tas mit eerlichkheet, wii wën teyer Kristus am tiine weyert. ₆Macht tas net ploos wën tii aych am opserweere sin, ploos fer tëne sayn tsuuxtimung kriin. Awer, als Kristus sayn sklaawe, macht mit ayer kans hërts was Hërkot wil. ₇Xaft mit frayt, wii wën teyer fer te Hër am xafe weyert un net fer mënxe. ₈Tënkt tas yeete mënx, sklaawe ore fraye, kept fom Hër peloont tëm noo mit was eyer macht.

₉Aychner fon sklaawe, pehantelt ayre sklaawe aach mit rexpekt un heyert uf tëne se trooe mit xtroof. Tënkt tas teyer un ayre sklaawe tsum selwiche Hër keheyert, woo im Himel is, woo al ekaal pehantelt.

₁₀Tsum xlus: teyer solt imer xtërker kewe, eenich am leewe mit em Hër un ti kraft am kriin fon tëm sayn kroos macht. ₁₁Tuut aych klayte mit tëm kanse panser woo Hërkot aych kept, fer xtram playwe keeche em Taywel sayn fale. ₁₂Wayl meyer sin net am khëmfe keeche mënxe, awer keeche ti xlechte kaystliche krafte woo in te hee leewe, was mënt, ti rechiirunge, ti autoriteete un ti machte woo ti welt fon te tunkelheet komplët tomineere. ₁₃Tesweche, hoolt yets te panser woo Hërkot aych kept. Soo, wën te taach khomt woo teyer ti kraft fom xlechtes pekeechne tuut, khënt teyer te faynte sayn iwerfalung aus hale un, wën teyer pis ans ën kekhëmft het, playpt teyer xtram, oone tsurik tsiye.

₁₄Also, playpt prepareyert. Penutst ti woerheet als kërtel. Klayt aych mit te prust plat fon te kerechtichkheet. ₁₅Un, als xuu, tuut aych fërtich mache fer ti kuut naychkheet fom friite aan saan. ₁₆Un nëmt te klaawe mit als xilt, fer aych xitse fon ale fayer fayle fom Taywel. ₁₇Halt ti retung als helm un Hërkots wort als xwaart woo te Hayliche Kayst aych kept. ₁₈Macht tas ales fer Hërkot am peete un tëm sayne hilef am ferlange. Peet imer, kefiert fom Hërkot sayne Kayst. Playpt am wache. Tuut net ti muut ferleere un peet imer fer tas kanse Hërkots folek. ₁₉Un peet aach fer mich, tas Hërkot mich ti richtich mensaaj kept tas, wën ich xpreche, mit koraaj xpreche un te kehëmnis fom ewankeelium pekhant mache. ₂₀Ich sin, in Kristus sayne naame, in te aarwat fon tëm ewankeelium, wën ich ach yets im kefëngnis sin. Also, peet tas ich koraaj hon fer te ewankeelium aan saan wii ich tas mache mus.

₂₁Tiikiko, unser liipe pruuter un leaale tiiner im Hër sayn aarwat, kept aych ale naychkheete iwer mich, tas teyer se wise kriit wii es mich keet. ₂₂Ich xike tee fer aych tas eyer aych fertseele tuut wii es hier uns keet, tas teyer aych uf muute khënt mit te informatsioone woo eyer kept.

₂₃Tas Hërkot, te Fater, un te Hër Yeesus Kristus friite un liipe, mit klaawe kewe fer ale priiter! ₂₄Un tas Hërkot sayne knaate mit aych al sich ferhalt, woo unser Hër Yeesus Kristus liipe tuun mit en liipe woo khee ën hot!