Sauwer leewe
1Teyer sayt liipe khiner fon Hërkot un tesweche mist teyer sin wii eyer. 2Tas ayer leewe tomineyert is fom liipe, soo wii Kristus uns keliipt hot un hot sayn leewe weche uns kep, wii en opfer fon kefeliche parfum un als en opfer woo Hërkot kefale tuut!
3Teyer sayt teel fom Hërkots folek; soo, aler sorte seksual imoraliteet, unaanxtënichkheet ore pekeerung khan net mool en phunkt fon kexpreech sin unich aych. 4Penutst khee unaanxtëniche wërter, saat khee tume ore trekiche wërter, wayl tas is net kuut fer aych. Kraat es keeche teel, saat tank wërter fer Hërkot. 5Khënt sicher sin: nii kriit en teel fom Kristus Raych un Hërkots Raych te persoon woo imoral is, unaanxtënich ore pekeerlich (wayl ti pekeerung is en sort fon iitole tiinst).
Im licht am leewe
6Lost nimant aych hinerkeen mit tum kexpreech, wayl is weche tëm tings woo Hërkot sayne xtroof truf fale tuut uf tii woo iim net aan heere. 7Also, teyer solt niks se tuun hon mit tëm sort mënxe. 8Frier het teyer selwer in te tunkelheet keleept; awer, yets woo teyer tsum Hër keheyert, sayt teyer im licht. Tesweche, leept als mënxe woo tsum licht keheere, 9wayl tas licht protutseyert en kroos ërnt fon aler sorte kuutheet, eerlichkheet un woerheet. 10Fersuucht aus se kluuche was fer tings em Hër kefale. 11Tuut khee teel hale an tëm tings oone weyert woo ti anere mache, tings woo tsu te tunkelheet keheyert. Im keeche teel, pringt tas tings ales tsum licht. 12Wayl es is ximplich sokaar xpreche iwer was tii mënxe ferxtekelt mache. 13Un, wën etwas tsum licht keprung kept, tan kept sayn echt natuer reweleyert. 14Wayl was kans klaar reweleyert kept transformeyert sich in licht. Un is tesweche woo mer saat:
“Tuu woo am xloofe pist, kep wach!
Xtay uf fom toot, un Kristus tuut tich ilumineere.”
15Also, kept acht wii teyer leewe tuut. Leept net wii tii woo unwisent sin, awer wii ti wisente. 16Ti taache woo meyer leewe sin xlecht; tesweche tuut aler keleechenheete woo teyer het kuut penutse. 17Hantelt net wii ti layt oone ferxtant, awer fersuucht ferxteen was te Hër hon wil tas teyer mache solt.
18Tuut aych net pesof trinke, wayl tas ketrënk nëmt aych ans unklik; awer filt aych fom Hërkots Kayst. 19Tuut eene em anere uf muntere mit psalme, hiimnos un kaystliche liiter. Singt, mit ayer kans hërts, liiter un psalme fer te Hër. 20Im naame fon unser Hër Yeesus Kristus, tankt imer aler tings fer Hërkot, te Fater.
Fraae un eemëner
21Tuut eene em anere aan heere, weche em rexpekt woo teyer het fer Kristus.
22Fraa, tuu tayne man aan heere, soo wii tuu te Hër aan heere tuust. 23Wayl te eeman hot autoriteet iwich sayn fraa, soo wii Kristus autoriteet hot iwich ti Khërich. Un te aychne Kristus is te Reter fon te Khërich, woo sayne khërwer is. 24Also, soo wii ti Khërich Kristus aan heere tuut, soo aach mus ti fraa in ales sayne man aan heere.
25Eeman, liip tayn fraa, soo wii Kristus ti Khërich keliipt hot un sayn leewe weche tëm kep hot. 26Tee hot tas kemach fer ti Khërich fer Hërkot tetikeere, mit waser sii am waxe un sii am sauwer mache mit sayn wort. 27Un hot tas aach kemach tas eyer khont ti Khërich tichter pay sich pringe in sayn kans xeenheet, phuer un perfekt, oone fleke, ore xrumple, ore anere feeler. 28Te man mus sayn fraa liipe soo wii eyer sayne aychne khërwer liipt. Te man woo sayn fraa liipt, liipt sich selwer. 29Wayl nimant hast sayne aychne khërwer. Im keeche teel, yeete ëne tuut sayne khëwer neere un uf pase, wii Kristus mit te Khërich mache tuut. 30Wayl meyer sin teel fon Kristus sayne khëwer. 31Wii ti Hayliche Xrifte saan: “Tesweche lost te man sayne papa un mama tsurik fer sich se fereeniche mit sayn fraa, un ti tswaay kewe wii eene.” 32Is en imëns woerheet reweleyert in tëm thekst fon te Xrifte, un ich ferxteen tas se am xpreche is iwich Kristus un ti Khërich. 33Awer is aach iwich aych am xpreche: yeete eeman mus sayn fraa liipe wii eyer sich selwer liipe tuut, un yeete fraa mus sayne man rexpekteere.
