Ti Khërich is Kristus sayne khërwer
1Tesweche tuun ich, woo in te katee sin wayl ich te Hër Yeesus Kristus tiine, aych ferlange tas teyer leewe solt in en aart woo xtimt mit was Hërkot wolt hon wii eyer aych keruuf hot. 2Sayt imer temiitich, tsaatlich un ketultich, eene em anere am aus hale mit liipe. 3Macht ales fer pehale, torich em friite woo aych fereenicht, ti eenichkheet woo te Kayst kept. 4Es kept ploos eene khërwer, un ploos eene Kayst, un een eensichst hofnung, woo Hërkot aych tetsuu keruuf hot. 5Es kept ploos eene Hër, ploos eene klaawe um ploos eene taaf. 6Un es kept ploos eene Hërkot un Fater fon ale mënxe, woo te Hër fon al is, woo torich ale mënxe xaft un is in tëne al.
7Awer, yeete ëne fon uns hot en ekstra kaape kriit, tëm noo was Kristus kep hot. 8Wii ti Hayliche Xrifte saan:
Wan eyer ruf kang is, uf ti heechste plets,
hot eyer fiil kefangne mit kehool
un hot kaape kep fer ti mënxe.
9Was mënt “eyer is ruf kang”? Tas mënt tas eyer aach runer kang is, noo te tiifste plets fon te eyert, pis an ti welt fon te toote. 10Soo, weyer runer kang is, is te selwiche woo ruf kang is, iwer ti himle, fer te kanse Uniwërs file mit sayn presëns. 11Es waar tee woo “kaape fer ti mënxe kep hot”. Eyer hot phaar aus kesuucht fer aphostle sin, anere fer profëte sin, anere fer ewankeliseere un noch anere fer farer un mayster fon te khërich sin. 12Tee hot tas kemach fer em Hërkot sayn folek prepareere fer ti kristlich aarwat, fer Kristus sayne khërwer paue. 13Soo kewe meyer al eenich in unsere klaawe un in unsere khëntnis fom Hërkot sayne Soon. Soo kewe meyer rayfe mënxe un khome an Kristus sayn kaystlich heecht. 14Tan wëre meyer net mee wii khiner sin, fon te wele kexlept un fon yeete wint kexupt torich ti untericht fon falxe layt. Tii layt pringe liye uf un, torich tëne, tuun se anere tsum ferkheyerte weech fiire. 15Im keeche teel, ti woerheet am xpreche mit kaystliche liipe, sole meyer wakse in ales pis mer an ti heecht fon Kristus khome, woo te khop is. 16Is tee woo macht tas te kanse khërwer kuut xafe tuut un ti teele unich sich fereenicht playwe. Un, soo, tuut yeete teel kuut funktsioneere, un te kanse khërwer wakst torich em liipe.
Tas alte leewe un tas naye leewe
17Tesweche, im Hër sayne naame saan ich un pexteen truf: leept net mee wii ti pakaane, wayl tëne sayn ketanke hon khee weyert, 18un tëne iire sin is in te tunkelheet. Tii hon khee teel kriit fom leewe woo Hërkot kept wayl tii sin komplët unwisent un tik khopich. 19Tii hon te kanse xaam ferloer un hon sich kans ap kep fer ti xlechte kewoonheete; tii hon khee kontrol un mache aler sorte unaanxtënich tings.
20Awer tas waar net te weech fom leewe woo teyer kelërnt het als Kristus aanhënger. 21Teyer het sicher fon tëm xpreche keheyert un, als tëm sayn aanhënger, het teyer ti woerheet woo in Yeesus is kelërnt. 22Also, lost in xtich ayer alt natuer, woo kemach hat tas teyer en sinte leewe keleept het un woo waar am fernicht kewe weche ayre falxe wile. 23Is neetich tas ayer hërts un ayre sin kans renoweyert kept. 24Mist aych klayte mit te nay natuer, fon Hërkot ketsoo, woo eenlich is mit Hërkot sayn aychne natuer un woo es echte leewe tsaycht, woo richtich is un tëm hiin kep.
Wii tas naye leewe leewe
25Tesweche, tuut net mee liye. Tas yeete ëne ti woerheet saat fer sayne pruuter im klaawe, wayl meyer al sin mitkliiter fon Kristus sayne khërwer. 26Wën teyer wuutich kept, lost net tas tas aych in sinte fale macht un playpt net te kanse taach mit wuut. 27Kept net fer te Taywel ti keleechenheet fer aych fersuuche.
28Weyer kextool hot sol net mee xteele, awer sol aanfange se xafe fer eerlich se leewe un ti aarme mit helfe khëne.
29Saat khee wërter woo xaate mache fer ti anere, awer penutst ploos kuute wërter, woo ti anere helfe wakse im klaawe un kriin was neetich is, tas es tings woo teyer saat kuut tuut fer weem es heere tuut. 30Un macht net tas Hërkot sayne Hayliche Kayst traurich kept. Wayl te Kayst is te sinal fon Hërkot sayn aychentum an aych ketuun, woo ti karantii is tas te taach khomt woo Hërkot aych pefraye tuut. 31Lost ale piterlichkheet neewe, ale has un ale wuut. Niks fon xraayeray, pelaytichunge ore xlechtichkheete! 32Im keeche teel, sayt kuut un froyntlich eene mit em anere. Un fertsayert ëne em anere, soo wii Hërkot, torich Kristus, aych fertsayert hot.
