Efësius 3

₁Tesweche peete ich fer Hërkot, ich, Phaulus, woo in te katee sin weche Yeesus Kristus fer kuut fer aych, tii woo khee yute sin. ₂Kans sicher west teyer xon tas Hërkot, weche sayne knaate, hot mich tii aarwat kep fer kuut fer aych. ₃Hërkot hot sayne heeliche plaan reweleyert fer mich un kemach tas ich en khëne teet. (Ich hon tas kexrip in phaar wërter, ₄un, wën teyer leese tuut was ich kexrip hon, khënt teyer wise wii ich Kristus sayn kehëmnis khëne.) ₅In te ferkangne tsayt is te kehëmnis net fertseelt kep fer ti mënxe, awer yets, torich sayne Kayst, hot Hërkot reweleyert fer sayn hayliche aphostle un fer ti profëte. ₆Te kehëmnis is tee: torich em ewankeelium tuun tii woo khee yute sin mit hale an te ferxprechung in Kristus Yeesus. Tii keheere tsum selwiche khërwer un tuun mit hale an te himlixe kaape mit te yute.

₇Weche em kaape woo Hërkot, in sayn kuutheet, mich kep hot, un, torich sayn macht, waar ich hiin ketuun kep als tiiner fom ewankeelium. ₈Ich sin weenicher wii te kleenste fon tëne al woo tsu Hërkot keheere, awer toch soo hot eyer mich ti knaate fer ti kuut naychkheet fon te mechtiche raychtume fon Kristus aan saan fer tii woo khee yute sin. ₉Un hot mich aach te priwilëëji kep fer se mache tas ti layt al siin wii te ferxtekelte plaan fon Hërkot sich realiseyert. Hërkot, woo ales ketsoo hot, hot tee kehëmnis ferxtekelt iwer ti ferkangne tsayte. ₁₀Un tas is paseyert tas yets, torich te khërich, ti autoriteete un ti ënglixe machte fon te himlix welt Hërkot sayn wisheet sole khëne in ale sayn ferxiitne forme. ₁₁Hërkot hot tas kemach tëm noo sayne eewiche opjektiif, woo eyer realiseyert hot torich Yeesus Kristus, unser Hër. ₁₂Wayl meyer fereenicht sin mit Kristus, torich unser klaawe an tëm, hon meyer te koraaj fer uns in Hërkot sayn presens stele mit sicherheet. ₁₃Also, ich ferlange aych tas teyer net uf kewe lost weche mayn layte um aych, wayl tii sin nutslich fer aych.

₁₄Tesweche, kniye ich mich foer te Fater, ₁₅fon weem ti kanse familye im himel un uf te eyert sayne echte naame kriin. ₁₆Un ich hale an Hërkot aan, tas fon te raychtum fon sayn kloor, torich sayne Kayst, eyer aych macht kewe sol tas teyer kaystlich xtarek sin solt. ₁₇Ich ferlange aach tas, torich em klaawe, Kristus in ayer hërts leewe sol. Un peete tas teyer wortsle un funtamënt im liipe het, ₁₈tas soo, mit em kanse Hërkots folek, khënt teyer Yeesus sayne liipe ferxteen in sayn kans prayt, lëngt, heecht un tiift. ₁₉Yoo, wën tas ach unmeechlich is sayne liipe perfektlich khëne, ich ferlange aych fer sayne liipe khëne khome, tas soo Hërkot ayer sin komplët aus file tuut mit tëm sayn natuer.

₂₀Un tas yets ti kloor kep wërt fer Hërkot, woo torich sayn kraft in uns xaft, un woo fiil mee mache khan wii meyer ferlange ore sokaar tënke tuun! ₂₁Kloor fer Hërkot torich ti Khërich un torich Yeesus Kristus, fer aler tsayte un fer imer! Aamen!