Fom toot tsum leewe
1Frier, wayl teyer Hërkot net aan keheyert hot un wayl teyer sinte kemach hot, waart teyer kaystlich toot. 2In tee tsayt waart teyer te xlechte weech fon tee welt noo kang un het te wile ketuun fon tëm woo te kaystliche macht fom welt raum kowerneyert, te kayst woo yets tii woo Hërkot net aan heere kontroleyert. 3In te woerheet, meyer al waare wii tii un hon keleept tëm noo unser mënxlich natuer, am mache was unsere khërwer un unsere sin wolte hon. Soo, wayl meyer mënxe sin wii ti anere, waare meyer aach testineyert fer layte mit mache mit Hërkot sayne xtroof.
4Awer, Hërkot sayn paarmhërtsichkheet is aarich kroos, un sayne liipe uf uns is soo fiil, 5tas, wii meyer kaystlich toot waare wayl meyer net keheyert hon, hot eyer uns ans leewe keprung woo mer hon in Kristus. Torich Hërkots knaate sayt teyer keret. 6Wayl meyer fereenicht sin mit Yeesus Kristus, hot Hërkot uns peleept mit iim tas meyer mit tëm rechiire in te himlix welt. 7Hërkot hot tas kemach fer se tsayche, in ale tsayte fom futur, ti mechtich kroosheet fon sayn knaate, woo unser is torich em liipe woo eyer uns ketsaycht hat torich Yeesus Kristus.
8Also, weche Hërkots knaate sayt teyer keret torich em klaawe. Tas khomt net fon aych, awer is en kexënk woo Hërkot kep hot. 9Ti retung is net en resultaat fon ayer aanxtrëngung; also, nimant khan sich xtolseere wayl eyer klaawe hot. 10Wayl, es waar Hërkot woo uns kemach hot wii meyer yets sin; in Kristus Yeesus, hot eyer uns ketsoo tas meyer ti kuute aktsioone mache khënte woo eyer xon prepareyert hat fer uns.
Fereenicht torich Kristus
11Tënkt traan tas teyer, woo khee yute sayt, waart unpexnitne kenënt fon te yute, woo fer sich selepst pexnitne nëne wayl se sich pexnayte lose. Tënkt an was teyer waart in te ferkangne tsayte. 12In tëne tsayte waart teyer oone Kristus; waart frëmte un het net keheyert tsu tas aus kesuuchte folek fon Hërkot. Het khee teel kehat in sayn alianse woo sayn basis hate an Hërkot sayn ferxprechunge fer sayn folek. Un in tee welt het teyer keleept oone hofnung un oone Kot.
13Awer yets, fereenicht mit Yeesus Kristus, sayt teyer, woo wayt wech fon Hërkot waart, ticht pay em keprung kep torich Kristus sayne toot am krayts. 14Kristus hot uns te friite keprung, wii eyer kemach hot tas yute un tii woo khee yute sin een eensichst folek weere. Torich te opfer fon sayne khërwer, hot eyer ti mauer fon fayntxaft um kexmis, ti mauer woo ti yute ap keteelt hon fon tëne woo khee yute sin. 15Eyer hot ti kesets kaput keleet, mit sayn kepoote un reechle tepay; un fon te tswaay foleke hot eyer een eensichst folek kepilt, nay un fereenicht mit iim. Soo waar tas eyer te friite keprung hat. 16Torich sayne toot am krayts, hot Kristus ti fayntxaft fernicht woo tswixe ti tswaay foleke waar. Torich em krayts, hot eyer se fereenicht in eene eensichste khërwer un hot se tsurik kenom fer Hërkot. 17Soo is Kristus khom un hot ti kuut naychkheet fom friite aan kesaat fer ti kanse layt, soo fiil fer aych, tii woo khee yute sin, woo wayt wech fon Hërkot waare, wii fer ti yute, woo ticht pay iim waare. 18Torich Kristus khëne meyer al, yute un tii woo khee yute sin, pis pay te Fater keen, torich te macht fom selwiche Kayst.
19Also, teyer, tii woo khee yute sin, sayt net mee frëmte net mool pesuucher. Yets sayt teyer xteter woo tsum Hërkots folek keheere un sayt mitkliiter fon tëm sayn familye. 20Teyer sayt wii en kepau un sayt kepaut kep uf em funtamënt woo ti aphostle un ti profëte keleet hon. Un te ek xteen fon tëm kepau is te aychne Yeesus Kristus. 21Tee halt tas kanse kepau kans fest un macht tas eyer wakse tuut wii en thëmpel woo fer Hërkot hiin keopfert kep is. 22Soo teyer aach, fereenicht in Kristus, sayt am kepaut kewe, paysamer mit te anere, fer en haus kewe woo Hërkot leewe tuut torich sayne Kayst.
