Pekriisung
1Ich, Phaulus, Kristus sayne aphostel torich Hërkot sayne wile, xraywe tee priif fer Hërkot sayn folek fon te xtat Ëfesus, tas folek woo fereenicht is mit Yeesus Kristus.
2Tas ti knaate un friite fon Hërkot, unser Fater, un fom Hër Yeesus Kristus mit aych sich ferhalt.
Kaystliche seechne
3Meyer mise tanke fer te Hërkot un Fater fon unser Hër Yeesus Kristus, wayl tee uns keseechent hot in Kristus, uns ale kaystliche kaape fon te himlix welt am kewe. 4Eep ti welt ketsoo kep waar, hot Hërkot uns xon aus kesuucht kehat in Kristus, tas meyer fer Hërkot keheere sole un uns foer iim presenteere oone xult.
Weche sayne liipe fer uns, 5hot Hërkot xon pextimt kehat tas eyer uns sayn khiner mache teet, torich Yeesus Kristus, wayl tas waar sayn frayt un sayne wile. 6Soo, loope meyer Hërkot weche sayn klorioose knaate, woo eyer uns umsonst kep hot torich sayne peliipte Soon. 7Wayl, torich Kristus sayne toot am krayts, sin meyer pefrayt, was mënt, unser sinte sin ferkep. Wii wunerlich is Hërkot sayne knaate, 8woo eyer uns soo raychlich kep hot!
Hërkot, in sayn wisheet un ferxtantnis, 9hot kemach was eyer resolweyert hat un hot uns te ferxtekelte plaan reweleyert woo eyer pextimt hat se mache torich Kristus. 10Tee plaan is fereeniche, an te richtich tsayt, unich Kristus sayn autoriteet, ales was eksisteyert im himel un uf te eyert.
11Aler tings kept kemach tëm noo Hërkot sayne plaan un wile. Tëm noo sayne wile un mit was eyer resolweyert hat tsayt am aanfang, hot Hërkot uns raus kesuucht fer sayn folek se sin in Kristus. 12Also, meyer woo ti eyerxte waare woo unser hofnung an Kristus ketuun hon, sole Hërkot sayn kloor loope.
13Tas selwiche is aach mit aych paseyert. Wan teyer ti echt mensaaj keheyert hat, ti kuut naychkheet woo ti retung fer aych keprung hot, het teyer an Kristus keklaapt. Un Hërkot hot sayne marke als aychner an aych ketuun wan eyer aych te Hayliche Kayst kexikt hot. 14Te Hayliche Kayst is ti karantii tas meyer kriin wole was Hërkot fer sayn folek ferxproch hot. Un tas kept uns ti sicherheet tas Hërkot ti komplët frayheet uns kewe tuut. Soo, sole meyer tëm sayn kloor loope.
Tank kepeet
15Tesweche, wayl ich keheyert hon xpreche iwich te klaawe woo teyer het am Hër Yeesus un fom liipe woo teyer het iwer ale priiter im klaawe, 16tuun ich net uf heere Hërkot se tanke weche aych. Ich tënke imer an aych in mayn kepeete. 17Un ferlange fer unser Hër Yeesus Kristus sayne Hërkot, te kloorixe Fater, tas eyer sayne Kayst aych kewe sol. Te Kayst macht aych wisent un tuut Hërkot fer aych reweleere, tas teyer iim soo khëne lërnt wii es sin sol. 18Ich ferlange tas Hërkot ayre ferxtant uf macht tas teyer sayn licht siin khënt un ti hofnung khëne tuut fer was eyer aych keruuf hot. Un aach tas teyer se wise kriit wii wunerlich ti seechne sin woo eyer ferxproch hot fer sayn folek 19un wii kroos sayn macht is woo uf uns xaft, tii woo an iim klaawe. Tii macht woo uf uns xaft is ti selwich mechtich kraft 20woo eyer penutst hot fer Kristus witer peleepe un kemach hot tas tee sich uf sayn rechts sayt setse teet in te himlix welt. 21Kristus rechiert iwer ale himlixe kowerneyer, autoriteete, krafte un machte. Eyer hot en thitel woo iwich ale thitle is fon te autoriteete woo eksisteere uf tee welt un uf te welt woo noch khome sol. 22Hërkot hot aler tings unich Kristus sayn autoriteet ketuun un hot Kristus fer ti Khërich kep als eensichste Hër fon ales. 23Ti Khërich is Kristus sayne khërwer; tii tuut Kristus komplët mache, tee woo ales komplët macht uf ale plets.