Kalatas 6

₁Mayn priiter, wën yemant erwixt kept in en feeler, teyer woo kaystlich sayt mist tëm helfe sich korijiire. Awer macht tas mit temiitichkheet un past uf tas teyer aach net in fersuuchunge fale tuut. ₂Heleft eene te anere un soo sayt teyer Kristus sayn kesets noo am keen. ₃Te mënx woo tënkt weyer important, wën eyer in te woerheet net is, is sich selepst am hinerkeen. ₄Tas yeete eene sich selepst unersuuche sol wii eyer hantle tuut! Wën es kuut is, tan khan eyer xtols sin uf was eyer ketuun hat, oone mise sich ferklayche mit te anere sayn hantlung. ₅Wayl yeete persoon mus sayne aychne last traan.

₆Te persoon woo Kristus sayne ewankeelium am lërne is sol sayn kuut tings ales teele mit tëm woo iim am in lërne is.

₇Tuut aych net fertuun: nimant tuut Hërkot ferxpote. Was yemant planse tuut, kraat tas tuut eyer ërnte. ₈Wën keplanst kept uf em lant fon sayn mënxlich natuer, fon tëm lant kept te toot keërnt. Awer, wën keplanst uf em lant fon Hërkots Kayst, fon tëm lant kept es eewiche leewe keërnt. ₉Meyer tërfe net miit kewe fom kuutes se tuun. Wayl, wën meyer net uf kewe, khomt ti richtich tsayt woo meyer ti ërnt mache. ₁₀Soo, imer wën mer khan, sole mer tas kuutes tuun fer yeete eene, ekstra fer tii woo teel hale in unser familye im klaawe.

₁₁Kukt ti kroose puxtaafe woo ich yets mit hant xraywe. ₁₂Ti woo aych tswinge wole fer aych se pexnayte lose, tii sin layt woo sich kuut foer xtele wole weche tings woo weenich weyert hot. Tii mache tas ploos fer net keyacht kewe weche Kristus sayn krayts. ₁₃Wayl net mool tii woo ti pexnaytung mache keen ti kesetse noo. Awer, ti wole tas teyer aych pexnayte lose solt tas tii sich praale khëne tas se te sinaal fon te pexnaytung an ayre khërwer traan ketuun hon. ₁₄Awer ich kewe xtols ploos iwer em Hër Yeesus Kristus sayn krayts. Wayl, torich em krayts, is ti welt toot fer mich, un ich sin toot fer ti welt. ₁₅Es macht khee unerxiit op te man pexnit is ore net; tas importante is tas eyer en naye mënx is. ₁₆Un, fer al woo tii reechel noo keen in sayn leewe, tas te friite un paarmhërtsichkheet pay tëne sich ferhalt un mit em kanse Hërkots folek!

₁₇Fer xlus se mache: tas nimant mee propleeme fer mich pringe sol, wayl ti marke an mayne khërwer tsayche tas ich Yeesus sayne sklaawe sin.

₁₈Mayn priiter, tas unser Hër Yeesus Kristus sayne knaate mit aych sich ferhalt. Aamen!