Markus 5

₁Yeesus un ti tisiple sin an ti rechioon Gerasa aan khom, uf ti aner sayt fon te Kalileya lakoo. ₂Soo wii Yeesus aus em poot kextii is, is mit tëm sich trefe khom en man woo tomineyert waar fon en xlechte kayst. ₃Te man is fom friithoof khom, woo eyer am woone waar. Nimant khont em fest hale, noch net mool mit khite. ₄Fiil mools hate se xon tëm sayn hënt un fiis aan kepun kehat mit aysne khete, awer eyer hot ales ferproch, un nimant khont iim tomineere. ₅Hot ti taache un nachte rom keprung an te përiche un tswixe ti kreewer, am xraaye un fer kërn sich wee am mache mit xteen. ₆Eyer hot Yeesus fon waytem kesiin, is kelaaf, is foer tëm uf ti kniye kefal ₇un hot kexraayt:

— Yeesus, Soon fom Heechste Hërkot! Was wolt teyer fon mich? Im Kotes naame hale ich aan: tuu mich net xtroofe!

₈Tee hot tas kesaat wayl Yeesus kexikt hat: “Xlechte kayst, kee aus tëm man!”

₉Yeesus hot kefroot:

— Wii is tayne naame?

Tee hot keantwort:

— Mayne naame is Kroos Folek, wayl meyer sin fiil.

₁₀Un hot tringlich ferlangt tas Yeesus net ti xlechte kayste fon tee rechioon fort yaae solt. ₁₁An en përich too ticht rom waare fiil xwayn am frese. ₁₂Ti kayste hon tringlich ferlangt fer Yeesus:

— Xik uns in tëne xwayn playwe; los uns in tii rin keen!

₁₃Eyer hot kelos, un ti kayste sin aus tëm man kang un sin in ti xwayn rin kang. Un ti xwayn, woo neekst tswaay tausent waare, hon sich përich runer kexmis, in en lakoo rin, un hon sich fersof.

₁₄Ti mëner woo ti xwayn am uf pase waare sin aus keris un hon ti naychkheet ferxtraut in te xtat un uf em khamp. Fiil layt sin kuke kang was paseyert waar. ₁₅Wii se ticht pay Yeesus khom sin, hon se te man kesiin woo tefoer tomineyert waar fon temoone; un hon sich ferwunert wayl eyer too am sitse waar, mit tsaych aan, in sayne perfekte ferxtant. ₁₆Tii woo tas ales kesiin hate, hon tëne fertseelt was paseyert waar mit tëm man un mit te xwayn. ₁₇Tan hon se aankefang tringlich se ferlange tas Yeesus aus tëne sayn lant këngt. ₁₈Wii Yeesus in tas poot am xtaye waar, hot te man woo keheelt kep waar tringlich ferlangt:

— Los mich mit aych keen!

₁₉Awer, Yeesus hot net kelos un saat:

— Kee hëm un fertseel fer tayn ferwante was te Hër tich ketuun hot un wii kuut eyer fer tich waar.

₂₀Tan is te man fort kang un fertseelt, in te rechioon fon te Tseen Xtet, was Yeesus fer iim ketuun hat. Un al hon sich ferwunert.

₂₁Wii Yeesus uf ti aner sayt fon te lakoo khom is, waar Eyer noch ticht am xtrant un hot sich xon en kroos folek kesamelt. ₂₂Too, is eene fon te haupste fon te sinakook tichter khom, woo Jairo keheest hot, un wii eyer Yeesus kesiin hot, hot eyer sich an tëm sayn fiis kexmis ₂₃un tringlich aan kehal:

— Mayn kleen meetche is am xtërwe! Khom, xtrek tayn hënt iwich se, tas se keret kept un leewe sol!

₂₄Yeesus is mit em kang. En kroos folek is em noo kang un hon em ferxupt.

₂₅Tort is en fraa hiin khom, woo xon tswelef yoer en ferpluutung hat. ₂₆Tii hat xon ales aus kep was sii hat, mit fiile toktre. Mit tëne hot se fiil mit kemach; awer ti hot sich ferxlechtert un net ferpesert. ₂₇Too hot se fon Yeesus xpreche keheyert un is tëm hine noo khom, tswixich em folek, un hot tëm an ti mantel kethupt. ₂₈Wayl se tënkt: wën ich noore tëm an ti mantel thupe, kewe ich xon kesunt. ₂₉Un klaych hot ti ferpluutung uf keheyert, un sii hot im khërwer kexpiert tas se kesunt kep waar fon sayn krankheet. ₃₀Yeesus hot kexpeyert tas kraft fon iim raus kang waar, un hot sich rom kewënt noo em folek un froot:

— Weyer hot an mayn tsaych kethupt?

₃₁Ti tisiple hon keantwort:

— Siist tas tas folek tich ferxupt un froost weyer tich aan kethupt hot?

₃₂Awer Yeesus hot um sich rom kekukt fer siin weyer tas kemach hat. ₃₃Too, am tsitre fon pang, wayl se wust was paseyert waar, hot ti fraa sich foer Yeesus sayn fiis keleet un hot ales fertseelt. ₃₄Un Yeesus saat fer ti fraa:

— Mayn khint, tayne klaawe hot tich keret! Kee in friite un playp fray fon tayne layt.

₃₅Eyer waar noch am xpreche, wii phaar layt fom xëf fon te sinakook sayn haus aan khom sin, un hon fer tee kesaat:

— Tayn meetche is xon kextorep, warom tuust tuu noch te Mayster xteere?

₃₆Awer, Yeesus hot khee acht kep iwich tii wërter, un saat fer te xëf fon te sinakook:

— Prauchst khee pang hon, tuu ploos klaawe.

₃₇Awer, hot nimant mit keen kelos, ploos Pheeter un ti priiter Tiaako un Yohan. ₃₈Wii se am xëf fon te sinakook sayn haus aan khom sin, hot Yeesus te kroose unruu kesiin, mit layt am prile un sich am uf reeche. ₃₉Wii se rin kang sin, saat Eyer:

— Warom sayt teyer soo unruych un am prile? Tas khint is net toot, tas is ploos am xloofe.

₄₀Tii hon em ferlacht. Awer Yeesus hot se al raus kexikt. Hot te papa un ti mama fom khint un noch ti tray woo mit em khom waare keruuft, un is in es tsimer rin kang woo tas meetche kelee hot. ₄₁Hot es an ti hant kehool un saat:

— "Talitá kumi!", was petayt: Meetche! Ich xike tich, xtay uf!

₄₂Klaych tëm noo is tas meetche uf kextii un hot aan kefang se keen. Es waar tswelef yoer alt. Tan hon se sich al hooh erxtaunt. ₄₃Awer, Yeesus hot en tringlich ortnung kep tas nimant tas se wise kreecht un hot kexikt solte etwas se ese kewe fer es meetche.