Markus 4

₁Yeesus hot noch mool aankefang se unterichte ticht am rant fon te Kalilëyer lakoo. Tas folek woo sich kesamelt hot um tëm rom waar in soo en kroose numer, tas eyer uf en poot kextii is un hot sich kesetst, ticht am xtrant, woo tas folek waar. ₂Yeesus hot paraaple penutst fer fiil tings lërne. Eyer saat:

₃— Heyert! En man is aus kang fer se seye. ₄Un, wii eyer ti soome am aus xtraue waar, sin phaar langxt te weech kefal, un ti feelcher hon ales kefres. ₅Aner teel fon te soome is uf en plats kefal woo fiil xteen waare un weenich eyert. Ti soome sin klaych aus kekhaymt wayl ti eyert net tiif kenuuch waar. ₆Awer, wii ti sun khom is, hot se ti plënsyer ferprënt, un sin fertrokent wayl se khee wortsle hate. ₇Anere soome sin tswixich ti tëner kefal, woo kewakst sin un ti plënsyer ferxtrike kemach, tesweche hon se niks protutseyert. ₈Awer, ti soome woo uf kuut lant kefal sin, sin kekhaymt, kewakst un hon traysich, sechtsich un pis hunert khërner fer yeete khorn protutseyert.

₉Un Yeesus macht xlus, am saan:

— Weyer oore hot sol kuut heere.

₁₀Wii tas kroose folek fort kang waar, hon ti layt woo too keplip waare mit te tswelef aphostle aankefang Yeesus aus se frooe iwich ti paraaple.

₁₁Yeesus saat tëne:

— Fer aych tsaycht Hërkot ti kehaymnis fon sayne Raych. Awer, fer tii woo aus sayne Raych sin, kept ales kelërnt torich paraaple, ₁₂tas se kuke un niks siin un tas se heere un niks ferxteen; sonst teere se tsurik noo Hërkot keen un tee teet se fertsaye.

₁₃Tan hot Yeesus kefroot:

— Wën teyer ti paraapel net ferxteet, wii khënt teyer ti anere ferxteen?

₁₄Un saat wayter:

— Te seyer seet em Hërkot sayn mensaaj. ₁₅Phaar layt woo ti mensaaj heere, sin wii ti soome woo langst te weech kefal sin. Klaych wii se tas heere, khomt Satanaas un hoolt ti mensaaj wech woo keseet kep waar in tëne sayn hërts. ₁₆Anere layt sin wii ti soome woo keseet kep waare woo fiil xteen waare. Wën se ti mensaaj heere, tuun se klaych aan nëme mit frayt; ₁₇awer, en kleen tsayt truf tuun ti layt ti mensaaj neewe lose wayl tas hot khee wortsle in tëne ketsoo. Un wën, weche te mensaaj, ti phayn un persekutsioone khome, tuun se klaych sayne klaawe neewe lose. ₁₈Noch anere sin eenlich mit te soome woo keseet kep sin tswixe te tëner. Tii heere ti mensaaj, ₁₉awer, wën ti soriche fon te welt khome, ti ilusioon fon te raychtum un anere keerunge, tuut tas tings ti mensaaj ferxtrike mache, un tii khan khee fruchte protutseere. ₂₀Un es kept ti layt woo sin wii ti soome woo keseet kep sin uf kuut lant. Tii heere ti mensaaj aan, un protutseere en kroos ërnt: phaar traysich, anere sechtsich; un noch anere hunert mool mee wii tas woo keseet kep waar.

₂₁Yeesus saat wayter:

— Tuut yemant, filaycht, en lamp aan mache fer unich en khorep se tuun ore unich es pet? Sicher net! Fer kuut se laychte, mus ti lamp uf en richtich plats ketuun kewe. ₂₂Wayl ales was ferxtekelt is, kept entekt, un ales was in kehëmnis is, wërt pekhant. ₂₃Weyer oore hot sol kuut heere.

₂₄Yeesus saat aach:

— Past uf mit was teyer heyert! Hërkot penutst fer aych se julkeere ti selwiche reechle woo teyer penutst fer ti anere julkeere. Un noch mee xtrënger! ₂₅Weyer hot, kriit noch mee; awer weyer net hot, sokaar tas pisye woo eyer hot kept wech kehool.

₂₆Yeesus saat:

— Hërkots Raych is soo wii wën en man en soom khërnche in ti eyert xmayse teet; ₂₇op eyer wach is, ore am xloofe is, tuut tii soom khayme un wakse, oone tas te man wees wii tas paseyert. ₂₈Ti eyert kept fruchte fon sich selepst; te eyerxt tas plënsye, tan te kholwe ore ti xoot un, tsum xlus, te fole khorn in te xoot ore kholwe. ₂₉Un, wën te soome xon tsaytich ore rayf is, klaych keet mer hiin mit te sichel, wayl ti ërnt tsayt khom is.

₃₀Yeesus saat noch mee:

— Noo was klayche mer te Kotes Raych? Ore mit was fer paraapel tuun mer en presenteere? ₃₁Is wii en mostart khënche, woo, wën es keseet wërt, te kleenste soome uf te welt is. ₃₂Awer, mool keseet, wakst tas un kept ti kreest kemiise un xmayst kroose est aus, soo tas ti feel fom himel in sayne xate niste mache khome.

₃₃Soo, fiil paraaple wii tii am penutse, hot Yeesus tas wort aus kexproch, tëm noo wii te heerer sayn kapasiteet. ₃₄Oone paraaple hot eyer sich net aus kexproch, awer, hot ales imer aus keleet, in priwaat, fer sayn aychne tisiple.

₃₅Am selwiche taach, foer nacht, waar Yeesus pay sayn tisiple. Too, hot eyer fer tii kesaat:

— Meyer reese mit en poot pis uf ti aner sayt fon te lakoo.

₃₆Un ti tisiple hon tas folek too kelos un sin mit em kereest. Un waare aach noch anere poote tepay. ₃₇Uf mool, hot en xtarke wint aankefang se ploose, tas ti wele mit kraft iwier te poot kexmis sin tas te poot fol waser am kewe waar. ₃₈Yeesus waar am xloofe an te hinerxt teel fom poot, mit em khop uf en khise. Too hon se Yeesus wach kemach un hon kesaat:

— Mayster! Meyer khome al um! Tuust tuu tich net too trum khimere?

₃₉Too is Yeesus uf kextii un hot xtram kexproch mit em wint un saat fer tas waser:

— Peruicht aych! Halt xtil!

Te wint hot xtil kehal, un ales is kalm keplip. ₄₀Too hot eyer kefroot:

— Warom hot teyer soo en pang? Het teyer imer noch khee klaawe?

₄₁Un ti tisiple, fol pang, hon ëne em anere kefroot: — Was fer man tas weyer woo soo en kraft het, woo pis iwer te wint un ti wele xike teet.