Markus 3

₁Yeesus is noch mool in ti sinakook kang. Too waar en man woo een fon te hënt laam hat. ₂Waare aach in te sinakook phaar layt woo Yeesus aan kewe wolte am saan tas tee net ti Kesets noo këngt; tesweche, sin se too keplip Yeesus am xpikuleere mit acht fer se siin op eyer te man heele teet am samstach. ₃Yeesus hot kesaat fer te man:

— Khom mool heyer!

₄Un hot kefroot fer ti anere:

— Was saat unser Kesets iwer te samstach? Was khan mer mache an tëm taach: tas kuutes ore tas xlechtes? Yemant rete fom toot ore xtërwe lose?

Nimant hot niks keantwort ₅Tan, hot Yeesus se pees un traurich aan kekukt wayl tii tas net ferxteen wolte. Un saat fer te man:

— Xtrek tayn hant!

Te man hot ti hant kextrekt, un tii is keheelt kep. ₆Klaych tëm noo, sin ti fariseyer fon too fort kang un, mit te layt fon Herootes sayne partay, hon se aankefang pleen se mache fer Yeesus um se pringe.

₇Yeesus un ti tisiple sin pis an ti Kalilëya lakoo kang. Mit tëm sin fiil layt kang fon Kalilëya, fon Yutëya, ₈fon Yeruusalëm, fon Itumëya, uf te oost sayt fom Jortan flus un fon te rechioon fon Tiiro un fon Sitoom. Al waare am keen fer Yeesus se trefe, wayl se keheyert hate xpreche iwich tas tings woo tee kemach hat. ₉Yeesus hot ferlangt fer ti tisiple tas se en poot iim pringe solte tas eyer net fertrikt keept fon tëm kroos folek. ₁₀Wayl tee waar soo fiil layt am heele, tas ale kranke sich am samle waare um iim rom fer an tëm se thupe. ₁₁Un ti layt woo xlechte kayste hate, wii se Yeesus kesiin hon, sin tëm foer ti fiis kefal un hon kexraayt:

— Teyer sayt em Hërkot sayne Soon!

₁₂Awer, Yeesus hot ti kayste xtram ferpot se saan weyer eyer weyer.

₁₃Yeesus is uf en përich kang, hot keruuf tii woo eyer wolt, un tii sin ticht pay em khom. ₁₄Tan, hot eyer tswelef mëner aus kesuucht fer pay iim se playwe un kexikt kewe fer te ewankeelium preetiche. Tii tswelef hot eyer aphostle kenënt. ₁₅Tii hon ti autoriteet kriit fer temoone aus se xtoose. ₁₆Ti tswelef waare: Simon, weem Yeesus te naame Pheeter kep hot; ₁₇Tiaako un Yohan, puuwe fon Zebedeu (fer tii hot eyer te naame Boanerges kep, was petayte wil “Khiner fom Toner”); ₁₈Antrëas, Filip, Partolomeu, Mateus, Tiaako, soon fon Alfeu; Tadeu, Simon, te natsionalist; ₁₉un Yuutas Iskariotes, woo Yeesus ap kep hot.

₂₀Wii Eyer hëm kang is, hot sich noch mool en kroos folek kesamelt, un tas waare soo fiil mënxe tas eyer un ti tisiple net mool tsayt hate fer se ese. ₂₁Yeesus sayn ferwante hon tas se wise kriit, un sin hiin kang fer em tehëm fest hale, wayl tii saate tas Eyer auser sich weyer. ₂₂Phaar Kesets mayster, woo fon Yeruusalëm runer khom waare, hon kesaat:

— Tee is fon Pelsepuu pesetst. Un: Is fer te kreeste taywel woo Eyer ti taywle aus xtoost.

₂₃Tan, hot Yeesus se aan keruuf un saat torich paraaple:

— Wii khan Satanaas sich selwer fort yaae? ₂₄Wën en raych keteelt ore tiwiteyert is keeche sich selwer, khan tiise raych net wayter pexteen. ₂₅Wën en haus keteelt is keeche sich selwer, khan tas haus net wayter pexteen. ₂₆Wën, also, te Satanaas uf kextii is keeche sich selwer un is tiwiteyert, khan er net wayter pexteen, awer wërt fernicht.

₂₇— Nimant khan im xtarke man sayn haus rin keen fer tëm sayn aychentum xteele oone eyerxt te man aan pine un tan tëm sayn haus aus raupe.

₂₈In woerheet saan ich aych tas ales fertsayert kept fer te mënxe sayn khiner: ti sinte un ti fluuche woo se aus xpreche. ₂₉Awer tee woo fluuche aus xprecht keeche te Hayliche Kayst kept net fertsayert fer imer, wayl eyer en aan keklaachte fon en eewiche sinte is.

₃₀Yeesus hot soo kexproch wayl se am saan waare tas eyer tomineyert weyer fon en xlechte kayst.

₃₁Too, sin sayn mama un sayn priiter aan khom un, wayl se auswënich playwe muste, hon se Yeesus ruufe kelos. ₃₂Fiile layt waare trum rom un saate iim:

— Heyer! Tayn mama un tayn priiter sin too traus un suuche tich.

₃₃Yeesus tëne kefroot:

— Weyer is mayn mama? Un weyer sin mayn priiter?

₃₄Tan hot Yeesus ronterom kekukt iwer tii woo too kesitst hon un saat:

— Too sin mayn mama un mayn priiter. ₃₅Also, yeete woo em Hërkot sayne wile tuut, tee is mayne pruuter, xwester un mama.