Yeesus heelt en laame man
1Phaar taache tëm noo, is Yeesus tsurik kang noo ti xtat Kafarnaum, un klaych is ti naychkheet tas eyer tehëm weyer ferprayt kang. 2Fiil layt sin pis tort hiin kang. Soo fiil mënxe hon sich kesamelt, tas net mool aus em haus, ticht an te teyer, plats waar. Soo lang wii Yeesus ti mensaaj am aan saan waar, 3hon se en laame man keprung. Fier mëner waare tee am traan, 4awer, weche tëne kanse layt, sin se net ticht pay Yeesus aan khom. Tan, hon se en loch in te tach kemach, uf em plats woo Yeesus waar, un torich tëm loch hon se te kranke runer kelos, in sayn pet am laye. 5Yeesus hot kesiin tas tii klaawe hate un saat fer te laame man:
— Mayn khint, tayn sinte sin fertsayert.
6Phaar Kesets mayster woo too kesitst hon, hon aankefang se tënke: 7“Was is tas fer tings woo tee man am saan is? Tas is en plasfeem keeche Hërkot! Nimant khan ti sinte fertsaye; ploos Hërkot hot tii macht!”
8Im selwiche momënt wust Yeesus was tii am tënke waare un saat:
— Warom sayt teyer tas tings am tënke? 9Was is laychter se saan fer te laame: “Tayn sinte sin fertsayert” ore “Xtay uf, hool tayn pet un kee”? 10Also, ich tsayche aych tas ich, te Soon fom Man, ti macht uf te eyert hon fer sinte fertsaye.
Tan saat eyer fer te laame:
11— Ich saan fer tich: xtay uf, hool tayn pet un kee hëm.
12Im selwiche momënt, is te man uf kextii foer te kanse layt, hot es pet kehool un is fort kang. Al hon sich ferwunert un hon Hërkot keloopt, am saan:
— Meyer hon nii soo etwas kesiin!
Yeesus un Lewii
13Yeesus is noch mool aus kang un is noo te Kalilëya lakoo kang. Fiil layt sin em uf suuche kang, un tee hot fer se al keuntericht. 14Soo lang wii eyer am keen waar, hot Yeesus Lewii kesiin, soon fon Alfeu, woo kesitst hot uf em plats woo ti xtayer petsaalt kep waar. Tan saat eyer fer Lewii:
— Khom mit mich.
Lewii is uf kextii un is mit em kang. 15Xpeeter hiin, waar Yeesus in Lewii sayn haus es nachts ese am ese. Pay Yeesus un sayn tisiple waare fiil xtayer kaseerer un anere layt mit en xlechte naame woo iim noo am keen waare. 16Phaar Kesets mayster, woo fon te fariseyer sayne partay waare, wii se Yeesus kesiin hon am ese mit tëne layt un mit te xtayer kaseerer, hon se fer ti tisiple kefroot:
— Warom tuut tee ese mit tëne layt?
17Yeesus hot keheyert was ti kefroot hon un saat fer ti Kesets mayster:
— Tii woo kesunt sin prayche khee tokter, awer toch tii woo krank sin. Ich sin khom fer se ruufe tii woo sinte mache un net ti kuute.
Yeesus un ti faste
18Yohan Te Taafer sayn tisiple un ti fariseyer waare am faste. Phaar layt sin ticht pay Yeesus khom un hon tëm kesaat:
— Yohan sayn tisiple un te fariseyer sayn tisiple tuun faste. Warom tuun tayn tisiple net faste?
19Yeesus hot keantwort:
— Tënkt teyer tas ti inkelatne fon en hochtsayt faste soo lang wii te praut pay tëne is? Soo lang wii tee too tepay is, is sicher tas se net faste! 20Awer khomt ti tsayt woo te praut fon tëne wech kehool kept; tan yoo, tuun tii faste!
21— Nimant penutst en nay xtik tsaych fer en alt klaytung se flike; wayl tas nay flik xtik keet in un ferayst tas alt klaytung, un tas loch kept noch kreeser. 22Nimant tuut naye wayn in alte haut sek. Wën yemant tas macht, tuun ti haut sek uf platse, te wayn keet ferloer un ti haut sek keen kaput. Tesweche, kept te naye wayn in naye haut sek ketuun.
Yeesus un te samstach
23An en samstach, waare Yeesus un sayn tisiple en waytse plantaaj torich am keen. Iwer em keen, waare ti tisiple waytse eere am ërnte. 24Tan hon phaar fariseyer fer Yeesus kefroot:
— Warom sin tayn tisiple tas am mache, etwas woo unser Kesets ferpiite tuut samstachs se mache?
25Yeesus hot keantwort:
— Het teyer net keleest was Dawii kemach hat, wii eyer un sayn khameraate khee ese hate un hon hunger kriit? 26Tee is in Hërkot sayn haus rin kang, in te tsayt fom Hooche Priister Apiatar, hot tas proot woo keopfert kep waar fer Hërkot kes un hot tas aach kep fer sayn khameraate. Awer, es is keeche unser Kesets yemant fon tëne proote ese; ploos ti priister hon te recht fer tas se mache.
27Un Yeesus macht xlus:
— Te samstach is kemach kep fer ti layt se tiine, un net ti layt fer te samstach se tiine. 28Also, te Soon fom Man hot autoriteet sokaar iwer te samstach.
